Chak mxaal Kob nya Harán
28
Zee lee Chak mrezh Kob nu ngunii wen xaa lo xaa nu ngunabeyy xaa xaa nu nzhé xaa:
—Nakat lu ngwnaa nee,
me Canaán.
2 Gwa naz Padan-aram,
garli xey lu Betuel,
xuz xnaa lu nu ka lu tub xnis lu,
xiin xich lu Labán.
3 Nel Dios,
Xaa Nkano Dubse Yalnabeyy nii wen lo lu nu gak zyen xtii lu;
nu lo lu roo zyen yezh naro.
4 Nu zaa xaa lo lu nu lo re xtii lu kwaan ngunii wen xaa lo Abraham nu gak xcheen lu yizhyo pa nzo lu,
paro nzho lu kwenta xaa zit nal.
Nel sbaa myaan xaa kwaan Abraham.
5 Snee mxaal Chak Kob naz Padan-aram,
zee ka xaa ngwnaa.
Nu mzhin xaa garli Labán,
xaa nak xinn Betuel.
Betuel nak xaa Aram nu nak xaa bzan Bek,
me nak xnaa Kob nu Esaú.
6 Nu ngune Esaú lee Chak ngunii wen lo Kob nu mxaal xaa xaa naz Padan-aram,
zee ka xaa ngwnaa naz ba.
Nu lee gorna ngunii wen xaa lo xaa nzhé xaa:
“Nakat lu ngwnaa Canaán”.
7 Nu lee Kob mbin xtizh xnaa nu xuz,
zee ngwa xaa naz Padan-aram.
8 Snee mzeen Esaú lee re xchaap xaa Canaán nawent lo xuz xaa.
9 Kwaanzee ngwa xaa lo Ismael,
xgann Abraham nu mka xaa tub ngwnaa me le Mahalat,
me nak xchaap Ismael,
bzan Nebaiot.
Nu ngok me stub sa xaa lo re me nkanola xaa.
Xmkaal Kob
10 Kob mroo Beerseba nu mzen naz nzha naz Harán.
11 Nu gorna ngwaazla mbizh mzhin xaa tub pa nu baa mlake xaa ngoot xaa.
Nu mzen xaa tub ke kwaan nzhikwaa baa,
mkoo xaa nu ngoot xaa.
12 Nu lee yaal zee mchaa lextoo Kob,
mlu tub skaler lo xaa,
kwaan nroo lo yo nu nzhin axta yiba.
Nu lee re mandad cheen Dios nkato nu nyixoob loya.
13 Noka mlu Xaa Tubka Nak lo xaa nzoli lo skaler kwaan mas ya.
Nu lee Dios nzhé:
—Na nak Xaa Tubka Nak,
Dios cheen Abraham nu Dios cheen Chak.
Lo lu nu lo re dii cheen lu,
za na yizhyo pa naxna lu.
14 Lee re dii cheen lu le na zyen doo kwenta yide kwaan nroo lo yo nu yo xaa dubse yizhyo ne.
Nu kwent cheen lu nu rese xtii lu le wen na lo dubse yizhyo.
15 Na nzo kwaan lu nu kanap na lu palpa nzha lu.
Nalat na lu,
nkin le na re kwaan ni na lo lu,
axtaka le na bare lu lo yizhyo ne.
16 Nu gorna mroo mkaal lo Kob nu nzhé xaa:
“¡Wli,
Dios nzo nee nu lee na naneta!”
17 Nu mzheb doo xaa nu mle xaa xgab:
“¡Nee nak tub pa nambey,
nzhaal zheb na ne na Dios,
nel nee nak garli Dios nu nee nak roo yiba!”
18 Nu stub mbizh garziil doo nguxche xaa nu mzen xaa ke kwaan mkoo xaa,
zee mzoli xaaya zee zelazh xaaya nu mxo xaa anseyt choya.
19 Nu mloole xaa zee,
Betel.a
Nu lee yilo lee yezh zee le Luz.
20 Naz ba ngunii xaa lo Dios nu nzhé xaa:
—Dios,
chelee lu ya lu kwaan na nu kanap lu na nu zaa lu kwaan gaw na nu kwaan gak na
21 nu chelee na wen na gorna bare na garli xuz na,
zee lu Xaa Tubka Nak gak Xtios na.
22 Nu lee ke kwaan mzoli na nee nak tub kwaan nlu lee nee nak garli lu.
Nu tubka za na lo lu tub part lo chii part lo re kwaan zaa lu lo na.