Chak ngunii wen lo Kob nu Esaú
27
Leezha ngox doo Chak nu nanyanitra garlo xaa,
zee tub mbizh mrezh xaa Esaú,
xgann xaa xaa yilo lo xaa.
Nu nzhé xaa:
—Xgaan.
Nu lee xaa mkeb:
—¿Cho kwaana,
Pa?
2 Nu lee Chak nzhé:
—Lu ne ngoxla na.
Nanet na pa zhe yet na.
3 Kwaanzee nzhekla na ya lu wen.
Wee lu xkwez lu nu kwaan nkeeya,
zee gut lu tub ma wen gaw na.
4 Nu keex lu baal lo ki modxa nyula na nu yaadno luya zee gaw naya,
zee nii wen na lo lu gorna zeeraka yet na.
5 Nu lee Bek nzo mkenzha gorna lee Chak kanii lo Esaú,
xgann xaa.
Nu zee lee Esaú nzha kampyar wen nzha kwaan ma.
6 Nu lee Bek ngunii lo Kob xgann me nu nzhé me:
—Mbin na lee xuz lu kanii lo wech lu nu nzhé me lo xaa:
7 “Kab lu tub ma wen nu keex lu ma lo ki,
zee yiidno lu ma gaw na,
zee nii na kwaan wen lo lu delant lo Xaa Tubka Nak gorna zeeraka yet na”.
8 Lee nal xgaan,
bin kwaan nii na lo lu le lu.
9 Gwa paro nzho re ma nu yaadno lu chop chib yeen,
ma chul lo re chib,
zee kaxkwaa na ma mer mod nyula xuz lu.
10 Zee ya laa luya zee gaw xuz luya nu sbaa nii me kwaan wen lo lu gorna zeeraka yet me.
11 Nu lee Kob nzhé lo Bek,
xnaa xaa:
—Wech na nzeb doo yich cho xaa nu lee na nyent yich cho na.
12 Nu chelee xuz na zen cho na,
zee gakbeyy na lo xaa,
le xaa xgab kakade na xaa nu napa kanii nawent xaa na lo kwaan nii wen xaa na.
13 Nu lee xnaa xaa mkeb:
—Xgaan,
na yalzo kwaan nawent nii xaa.
Lu ble kwaan ni na lo lu nu gwa guxii chop ma.
14 Zee lee Kob ngwaxii chop ma nu nyaadno xaa ma lo xnaa xaa.
Nu lee xnaa xaa mkeex ma chul doo mer modxa nyula xuz xaa Chak.
15 Nu lee Bek ngwa nguloo tub xab Esaú kwaan chul doo lo rese kwaan nkano xaa garli xaa;
nu mzaa meya ngok Kob,
xaa gwluzh lo me.
16 Nu leeka yed cheen chib msaaw me yaa xaa nu yenn xaa paro nyent yich.
17 Nu mzaa me baal myeex lo ki nu yat nzhobxtil lo xaa kwaan mdexkwaa me.
18 Zee lee Kob mzeeb paro nzho xuz xaa nu nzhé xaa:
—Xuz na.
Nu lee Chak nzhé:
—Na nee.
¿Xana xgaan na nak lu?
19 —Na nak Esaú,
xgann lu xaa yilo —nzhé Kob—.
Ngulola mdexkwaa na kwaan né lu lo na.
Guxche nu naab na lo lu zob nu daw ma kwaan mzen na;
nu nii kwaan wen lo na nal.
20 Zee lee Chak mkeb:
—¿Xomod mle lu zee tant liger nguzhal ma lo lu,
xgaan?
—Lee Xtios lu,
Xaa Tubka Nak,
mle yud na nguzhal ma —nzhé Kob.
21 Nu lee Chak nzhé:
—Bii gax lo na,
zee zen na cho lu,
zee ne na che wlipa lu nak xgaan na Esaú.
22 Nu lee Kob mbii gax lo xuz xaa,
zee mgal xaa cho xaa,
zee nzhé Chak:
—Mod nzhedizh lu nak mod Kob nu lee yaa lu nak mod yaa Esaú.
23 Nu sbaa namlabeyyt xaa nel yaa xaa nzeb doo yich mod yaa Esaú.
Nu ngunii wen xaa.
24 Nu lee xaa ngunabdizh lo xaa stuba:
—¿Che wlipa lu nak xgaan na Esaú?
Nu lee Kob nzhé:
—Na nak Esaú.
25 Zee lee xuz xaa nzhé:
—Teno ma mbit lu,
zee gaw na,
zee nii wen na lo lu.
Zee lee Kob mzaa kwaan ndaw xuz xaa nu noka mzaa xaa xis ub ngu xaa.
Zee lee Chak ndaw nu ngu.
26 Zee nzhé Chak:
—Te gax nal xgaan nu zaa tub bit lo na.
27 Nu lee Kob mbii gax nu mzaa xaa tub bit.
Zee lee Chak mdebxii xaa,
zee ngunii wen xaa lo xaa kwaan wdizh ne:
¡Snee nzebech xgaan na,
kwenta bech cheen re yag wen,
kwaan chul mle Xaa Tubka Nak!
28 Nu Dios sela yey yiba lo lu
zee gak doo yalgon cheen lu
nu zaaya zyen doo nzhobxtil nu ub.
29 Nu ke zyen xaa zhiin lo lu
nu kichxub rese yezh lo lu.
Nabeyy lu lo re wech lu
nu kichxub xaa nak xinn xnaa lu lo lu.
Xobde na lo re xaa xobde lo lu
nu nii wen na lo re xaa nii wen lo lu.
30 Ngulo ngunii wen Chak lo Kob nu pense nzha mroo Kob lo Chak,
gorna lee Esaú mbare ngwa tab ma wen.
31 Nu noka lee xaa mdexkwaa tub kwaan chul doo ndaaw.
Zee mbe xaaya lo xuz xaa nu nzhé xaa:
—Guxso nal xuz,
nel lee na nzenola ma mzen na gaw lu.
Nu gunii wen lo na nal.
32 Zee lee Chak ngunabdizh:
—¿Cho nak lu?
Nu lee xaa mkeb:
—Lee na nak Esaú,
xgann lu,
xaa gro.
33 Zee lee Chak mdedyall nu dub xaa mxiz nu nzhé xaa:
—¿Cho xaa nak xaa ngwa yut ma mzaa lo na?
Nu lee na ndawa gorna zeeraka zhin lu.
Nu ngunii wen na lo xaa,
lee nal lo lee xaa mlake wena.
34 Gorna mbin xaa kwaan nzhé xuz xaa,
zee nales doo ngok lextoo xaa nu nye doo mbinn xaa nu nzhé xaa:
—¡Xuz na,
noka nii wen lo na!
35 Nu lee Chak mkeb:
—Mbiidla wech lu nu mkade xaa na nu mkayaa xaa kwaan nyalzo lu.
36 —¡Kwaanzee mroole xaa Kob!a
—nzhé Esaú—.
Nu nzhala chop bes nzha kakade xaa na;
yilotlaka mkiib xaa xcheen na kwaan nyalzo xaa yilo,
lee nal mkiib xaa kwaan wen kwaan ngunii lu.
¿Che nyentra stub kwaan wen nii lu lo na?
37 Zee lee Chak mkeb:
—Na mzob xaa zee nabeyy xaa lo lu,
zee lu nu re sawlizh lu ke zhiin lo xaa.
Nu ngunii wen na lo xaa zee kano xaa zyen doo nzhobxtil nu xis ub.
Nyentra cho kwaan za na lo lu,
xgann.
38 Esaú mle jwers:
—¿Che nagarlot nii lu nebse stub wdizh wen lo na,
xuz na?
Nu lee Esaú mbinn doo.
39 Nu zee lee Chak nzhé:
Yo lu zit lo yizhyo wen
nu lo yey kwaan nla naz yiba.
40 Kwaan xspad lu ban lu
nu ke lu zhiin lo wech lu.
Per gorna gak lu tub xaa nabeyy,
zee kiib lu yog cheen wech lu yenn lu.
Kob mxonn lo Esaú
41 Nu sbaa mzelo Esaú nayii ne Kob,
nel mkiib xaa kwaan mzaa xuz xaa nu mle xaa xgab:
“Zhin tub mbizh kaach na xuz na,
¡zeera gut na wech na!”
42 Nu gorna lee Bek ngune kwaan kale Esaú xgab,
zee mrezh me Kob nu nzhé me:
—Lee wech lu nle xgab gut lu.
43 Kwaanzee kenzha xgann,
xonn nu gwa naz Harán garli bzan na Labán.
44 Nu xche yo lu kwaan lee xaa axta yilo ded yalxyan lo wech lu
45 nu yenlazh xaa re kwaan mle lu.
Zee leeka na niya lo lu,
zee nzho mod yaad lu.
Nanzheklat na luux na rop xiin na tuka mbizh.
46 Zee lee Bek nzhé lo Chak:
—Ngulola nguche yek na ne na rop me mka Esaú nu chelee Kob chelya nee kwaan me xtii Het,
kwenta me ne,
¡mas wen yet na!