Xaa nke zhiin lo Abraham ngwake sa Chak
24
Abraham nak tub xaa ngoxla nu Xaa Tubka Nak mzaa zyen doo kwaan lo xaa.
2 Nu lee tub mbizh nzhé Abraham lo tub xaa gol lo rese xaa nke zhiin lo xaa,
xaa ngwii lo re xcheen xaa nu nzhé xaa:
—Cheep yaa lu cho kor na.
3 Wlipa cheroo lu lo Xaa Tubka Nak,
Dios,
xaa mdexkwaa yiba nu yizhyo,
ke nakat Chak tub ngwnaa me Canaán,
paro nzho na nee.
4 Mas wen ya lu lo dii cheen xuz na nu kwaan lu tub me ka Chak lo re sawlizh na.
5 Per lee xaa nkanap xcheen xaa mkeb:
—Per chelee me nazeyalt me yaad me kwaan na,
¿che nzhaal we na xgann lu zee leeka lee xaa kwaan tub me?
6 Nu lee Abraham mkeb:
—Nanzhaalt wee lu xiin na naz ba.
7 Nel lee Dios yiba ngunaab lo na ke la na garli xuz na nu lazh na nu né xaa:
“Wlipa na,
lee re yizhyo ne za na lo re dii cheen lu”.
Nu lee xaa xaal tub mandad ya kwaan lu zee wen ya lu nu yizhal lu me nak dii cheen xuz na,
ka xgaan na.
8 Nu chelee me nazeyalt me yaad me kwaan lu,
kwaanzee nakanotra lu kwent kwaan na.
Per lee xiin na nazat na diizh wee lu xaa naz ba.
9 Zee lee xaa nke zhiin lo Abraham mcheep yaa cho kor xaa nu mcheroo xaa le xaa kwaan nzhé xaa.
10 Zee lee xaa mbe tub chii kamey nu mleey xaa lak kwaan zelazh xaa kwaan mas nonra wee xaa nu ngwa xaa yezh Nacor,
kwaan nzhi naz Mesopotamia.
11 Nu ngulo mzhel yizhyo,
zee mlaz xaa gax roo tub bzo,
zee mle xaa mkichxub re xkamey xaa naz roo yezh.
Nu gorzee lee re me nroo nyiidxii nis roo bzo.
12 Baa lee xaa nke zhiin lo Abraham ngunii lo Xaa Tubka Nak snee:
—Dios cheen Abraham,
xaa nkee na zhiin lo,
naab na lo lu zee gak wen lu kwaan xaa nabeyy lo na nu lee zee wen ya na.
13 Wii lo na roo bzo ne,
lee nal nyiid re me koo nis.
14 Bleya zee lee ngwnaa kwaan naab na cheep nis goo na kwaan leen xre me nu nanebt zaa meya goo na,
nel noka lo xkamey na zaa me nis go.
Nu lee me,
gak me mleey lu ka Chak,
zee ne na nlu lu yalnkela lo xaa nkee na zhiin lo.
15 Nu kaniika xaa lo Dios,
lee Bek mzhinola re nu nzoba yenn.
Bek nak xinn Betuel nu xos Milca nu Nacor,
xaa nak wech Abraham.
16 Nu Bek nak tub me jormay nu techo me nu zer kano me xaabyi.
Mla me roo bzo nu mtazhe me xre me nu nya me.
17 Gorzee lee xaa nke zhiin lo Abraham,
mrexonn ngwa nu nzhé:
—Naab na lo lu,
zaa lu tub chuut nis kwaan nzho leen xre lu goo na.
18 Nu lee Bek mla xre yenn nu nzhé:
—Guya.
—Noka za na nis go re xkamey lu.
Zee ngu maya axta paro nguzhe lextoo ma.
20 Nu lijer mtazhe me nis leen pa nzho re ma nis.
Nu mrexonn me ngwasee me nis leen bzo nu zyen welt ngwa me axta paro nguzhe lextoo re xkamey xaa.
21 Nu lee xaa nke zhiin lo Abraham nzose ngwii nu nik tub kwaan nanzhét xaa,
nel nzhekla xaa ne xaa nel chelee kale Dios yud xaa,
zee yizhal xaa ngwnaa ka Chak.
22 Lee gorna lee kamey ngulo ngu nis,
lee xaa mlu tub ani or lo me kwaan nga xoopgram kwaan mkee xaa xii me nu noka mlo xaa chop kwaan yenn yaa me kwaan nak or nu ngaya tub gayoo gram.
23 Nu ngunabdizh xaa:
—Naab na lo lu,
¿cho nak xuz lu?
¿Che nzak lu re xaa na nzho mod lake garli lu nawzhe?
24 Lee Bek mkeb:
—Na nak xinn Betuel,
xinn Milca nu Nacor.
25 Lee garli nu nzho pa kwaz gu nawzhe nu noka nzho zyen kwaan gaw kamey.
26 Nu leeka gorzee lee xaa nke zhiin lo Abraham mkichxub xaa axta mla lachuzh xaa lo yo nu mzaa xaa dixkix lo Xaa Tubka Nak.
27 Nu nzhé xaa:
—Wen doo nak Xaa Tubka Nak,
Dios xaa nabeyy lo na.
Tubka wen nu nali nak xaa lo Abraham,
xaa nabeyy lo na.
Nu nzhano xaa na axta garli sawlizh xaa.
28 Nu gorna mbin Bek kwaane,
zee mrexonn me nya me garli me.
Zee nzhé me rese kwaan mded me lo xnaa me.
29 Nu lee me mkano tub bzan,
xaa le Labán nu lee xaa mrexonn ngwa kwaan xaa zee,
30 nel ne xaa lo ani nu kwaan nzho yenn yaa me nu mbin xaa re kwaan nzhé me.
Nu gorna mzhin xaa lee xaa nzoka roo bzo kwaan xkamey xaa.
31 Nu nzhé xaa:
—Xaa Tubka Nak mzhino lu axta re.
Chaa nya be garli na.
Nalaket lu naz jwer,
nel mdexkwaala na tub pa kwaz lu nu noka pa kwaz xkamey lu.
32 Zee lee xaa nke zhiin lo Abraham ngwa garli xaa;
nu Labán mzaa nis lo xaa nu lo re xaa xaa zee zet xaa nii xaa.
Nu mloo xaa xab kamey nu noka mzaa xaa yix ndaw ma.
33 Nu gorna mlek xaa kwaan gaw xchee xaa,
per lee xaa mke zhiin lo Abraham nzhé:
—Nagawt na axta ke nii na chozhiin nzhal na nee.
—Na nak xaa nke zhiin lo Abraham.
35 Lee Xaa Tubka Nak mle zyen xcheen xaa nu nzhap xaa zyen doo kwaan.
Nu mzaa Dios mbakxiil,
ngoon,
plat,
or,
xaa nke zhiin,
me nke zhiin,
kamey nu ngwes.
36 Nu rop sa xaa Sara mkano tub xgann nixa ngoxla me,
per ngol tub xgann me nu mlake re xcheen xaa lo xaa.
37 Nu lee xaa nkee na zhiin lo né lo na:
“Wlipa nakat xgaan na nik tub ngwnaa Canaán,
paro nzhoo na.
38 Lee nal nkin ya lu lo dii cheen xuz na,
zee yaxii lu tub ngwnaa ka xgaan na lo re sawlizh na.”
39 Nu lee na nzhé lo xaa:
“Chelee ngwnaa nazeyalt reke tich na”.
40 Zee lee xaa mkeb lo na:
“Na nzee lo xnaz Xaa Tubka Nak,
lee xaa xaal mandad cheen xaa ya kwaan lu,
zee wen ya lu nu wee lu me nak dii cheen xuz na ka xgaan na.
41 Nebse chelee sawlizh na nazeyalt zaa mad,
kwaanzee nakanotra lu kwent kwaan na.”
42 Nalzhe mzhin na roo bzo nu ngunii na lo Xaa Tubka Nak:
“Dios cheen Abraham,
xaa nkee na zhiin lo,
chelee lu wlipa nzhekla lu wen ya na,
43 naab na lo lu,
lee nal nzo na roo bzo,
chelee tub ngwnaa mad yiidxi nis,
zee yé na lo me:
“Zaa cheep nis kwaan nzho leen xre lu goo na.”
44 Zee keb me lo na:
“Guya” nu noka xkamey na né me goya,
me sbaa né nak me mleey Xaa Tubka Nak ka xgann xaa nkee na zhiin lo.
45 Zeeraka yilo nii na lo Dios,
lee Bek mzhinla kwaan xre me kwaan nzob yenn me.
Zee mla me re yenn me nu mtezhe me nis leena,
zee nzhé na lo me:
“Zaa cheep nis goo na”.
46 Zee lee me mla xre yenn nu né me lo na:
“Guya.
Nu noka xkamey lu za naya go.”
Nu lee me mzaa nis ngu na nu noka mzaa meya ngu xkamey na,
47 zee lee na ngunabdizh nu nzhé:
“¿Cho xinn nak lu?”
Nu lee me mkeb:
“Lee na nak xchaap Betuel,
xgann Nacor nu Milca”.
Zee lee na mkee tub ani or xii me nu mlo na chop kwaan yenn yaa me.
48 Nu zee mkichxub na ngunii na lo Xaa Tubka Nak,
xaa nak Xtios Abraham nu mbill na lo xaa,
xaa mkanap na naz zee nalise mzhin na lo xos xuz xaa,
zee we na ngwnaa ka xgann xaa.
49 Lee nal nen che wen nu nali le lu lo xaa nkee na zhiin lo;
nu chelee lu nanzheklat lu zaa lu me zee ne na cho kwaan le na”.
50 Zee lee Labán nu Betuel mkeb nu nzhé:
—Kwaane nze lo Xaa Tubka Nak nu lee re nu nyent mod né lo lu “Nzho moda nu nyent moda”.
51 Wii,
lee Bek nzho nee,
be me nu zyaa,
zee gak me sa xgann xaa nke lu zhiin lo,
modxa nzhekla Xaa Tubka Nak.
52 Gorna mbin xaa nke zhiin lo Abraham wdizh kwaan nzhé xaa,
mkichxub xaa lo Xaa Tubka Nak,
axta mla lachuzh xaa lo yo.
53 Nu lee xaa nke zhiin lo Abraham mlo re kwaan nak or,
kwaan nak plat nu ler kwaan mzaa xaa lo Bek.
Nu noka re kwaan wen mzelazh xaa lo bzan me nu lo xnaa me.
54 Zee ndaw xchee rese xaa,
zeera ngoot xaa.
Nu lee stub mbizh garziil doo nguxche xaa nu nzhé xaa:
—Zaa diizh bare na lo xaa nkee na zhiin.
55 Zee lee bzan me nu xnaa me mkeb:
—Laa kwaz mad zlak mbizh kwaan re nu,
gola xchii mbizh,
zeera wee lu mad nu nya lu.
56 Zee lee xaa nke zhiin lo Abraham mkeb nu nzhé:
—Nalet lu tras na,
Dios mle wen lo na,
lee nal ngola nya na stuba.
Snee nya na garli xaa nkee na zhiin lo.
57 Zee lee re xaa mkeb:
—Ya chezh be Bek,
zee nen cho kwaan né me.
58 Nu mrezh me Bek nu nzhé me:
—¿Che zya lu kwaan xaabyi ne?
Nu lee me mkeb:
—Nya na kwaan lee xaa.
59 Zee mlaa me nya Bek kwaan ngwnaa,
me mkano me gorna win me,
kwaan re xaa nke zhiin lo Abraham.
60 Zee lee re xaa li me ngunii wen lo me,
nzhé:
Bzan be,
tira gak lu xnaa zyen doo xaa,
lee dii cheen lu le gan lo dil kwaan re yezh kwaan nayii ne xaa.
61 Zee lee Bek nguxso kwaan re ngwnaa nu nguxoob me tich kamey nu nya me kwaan re xaa nke zhiin lo Abraham.
Sbaa mroo re xaa Bek nu mbare xaa lo Abraham.
62 Nu lee Chak nzha naz roo bzo kwaan le Bzo cheen Xaa Mban,
xaa ngwii lo na,a
kwaan nzho naz yizhyo Neguev.
63 Nu lee Chak mroo nzha zaa tub welt mzhela yizhyo,
zee yanii xaa lo Dios.
Nu zee mlaach xaa,
ta mlu lak kamey lo xaa,
ma nyaad gax.
64 Noka Bek mlaach lo Chak nu mla me tich kamey.
65 Zee ngunabdizh me lo xaa nke zhiin lo Abraham:
—¿Cho xaabyi nze naz wen,
xaa nze naz lo re be?
Nu lee xaa nke zhiin mkeb:
—Xaa ba nak xaa nkee na zhiin lo.