Ngol Chak
21
Nu lee Xaa Tubka Nak ngwa lo Sara,
zee ngok kwaan ngulola nzhé xaa.
2 Kwaanzee mbeyxinn me nu mkano me tub xinn Abraham mer mbee kwaan nzhé Dios lo xaa,
nixa ngoxla xaa.
3 Zee lee Abraham mloole mad Chak.a
4 Nu mlo xaa beey mad gorna nzho mad xon mbizh,
modxa nzhé Dios.
5 Nu nzho Abraham tub gayoo liin gorna ngol Chak.
6 Nu lee Sara nzhé:
—Me Tubka Nak mle zee mxizh na.
Nu rese me ne ke lee na nkano tub mad nu xizh me kwaan na.
7 Lee Abraham tira namlet me xgab,
nixa ngox me kano me tub mad.
Nu nal mkano na tub xinn me nixa ngoxla me.
Abraham mloo Hagar nu Ismael
8 Nu nzha xen Chak,
lee tub mbizh lee Sara mlaa namzaatra nizh ngu mad,
zee lee Abraham mle tub yalni naro.
9 Zee lee Sara ngune lee xinn Agar rop Abraham mxizhno Chak.
10 Kwaanzee ngwa me lo Abraham nu nzhé me:
—Bloo Hagar,
me nke zhiin lo be nu xinn me,
nel re kwaan yalzo Chak,
nanzhaalt yalzo Ismael.
—Nalet lu xgab Ismael nu nixa me nke zhiin lo lu.
Ble rese kwaan né Sara lo lu,
nel dii cheen lu nze lo Chak.
13 Nu noka xgann me nke zhiin lo lu,
le na tub yezh naro,
nel noka nak xaa dii cheen lu.
14 Zee lee Abraham nguxche garziil doo.
Mzen yat nzhob xtil nu yed nis mzaa xaa lo Agar.
Nu mkee meya tich me.
Nu noka mzaa xaa Ismael nu ngunii xaa:
“Wen nya lu”.
Zee lee me mroo nya,
mod tub me nkanze,
naz yo bizh cheen Beerseba.
15 Nu gorna ngulo mlux nis leen yed,
zee mlaa me mad xan tub yag win.
16 Zee nya me mzo me tub lad,
kan paro nzhin tub wez nu mdix me mad,
nel nanzheklat me wii me lo mad nel xomod yet mad.
Zee lee mad nzhonn.
17 Nu lee Dios mbin lee mad nzhonn nu lee mandad cheen Dios mrezh Agar naz leen yiba.
Nu nzhé:
—¿Hagar,
cho kwaan nzak lu?
Nazhebt lu,
nel Dios mbin mbazhe mad pa nzo gu.
18 Gwa nu bzoli Ismael nu naselat lu mad.
Na le lo xaa roo tub yezh naro.
19 Zee lee Dios mlu lo me lo tub paro nzhib nis,
zee mtezhe me yed nu mzaa meya ngu Ismael.
20 Lee Dios mzo kwaan Ismael nu mxen xaa lo yizhyo mbizh Parán.
Nu mzhin xaa ngok xaa tub xaa chul nkee wez.
21 Nu ngu xaa naz yizhyo bizh Parán.
Nu xnaa xaa nguke tub ngwnaa me Egipto mka xaa.
Abraham nu Abimelec mkano tub trat
22 Mbizh zee,
Abimelec ngwa mdizh kwaan Abraham,
zee mbe xaa Ficol,
xaa nak xaa non lo re soldad cheen xaa.
Nu lee Abimelec nzhé lo Abraham:
—Dios tubka nzo kwaan lu lo rese kwaan nle lu.
23 Cheroo lo Dios zee nalet lu nik tub kwaan nawent lo na,
nixa lo re xgaan na nu nixa lo re xos na.
Le wen lu lo na mod mlela na lo lu,
nel nzho lu leen xkizhyo na.
24 Zee mkeb Abraham:
—Wlipa na,
sbaa le naya.
25 Zee lee Abraham mzaa kwent kwaan ngok yilo lo Abimelec:
—Nzhekla xaa lu kib bzo ne lo na.
26 Nu lee Abimelec mkeb:
—Axta nal,
nanet na nik tub re kwaane,
nel nik tub kwaan nanét lu lo na.
27 Nu lee Abraham mzen mbakxiil nu ngoon nu mzaa xaa ma lo Abimelec.
Nu leeka mbizh zee rop xaa myaan.
28 Per lee Abraham mloo tub gazh mbakxiil,
ma gol yeen.
29 Nu lee Abimelec ngunabdizh:
—¿Cho kwaan kwaane?
¿Chozhiin mloo xa lu tub gazh mbakxiil?
30 Lee Abraham nzhé:
—Nzhekla na kayaa lu tub gazh mbakxiil ne,
ma za yaa na nu lee ma gak tub kwaan luu lee na mdeen bzo ne.
31 Kwaanzee lee baa le Beerseba,b
nel baa mcheroo Abraham nu Abimelec.
32 Zee gorna ngulo myaan xaa kwaan Abraham naz Beerseba,
lee Abimelec nu Ficol mbare naz lazh,
naz yizhyo Filistea.
33 Nu leeka naz Beerseba,
lee Abraham mxoble tub xan yag pin nu mzaa Abraham dixkix lo Xaa Tubka Nak,
xaa tira nak.
34 Nu zyen doo liin ngu Abraham xkizhyo Filistea.