Abraham nu Abimelec
20
Abraham mroo pa nzho xaa zee nya xaa yizhyo le Neguev nu zee mlaz xaa yezh Gerar,
kwaan nzhi gax Cades nu Shur.
2 Nu nzhé Abraham lo re xaa,
lee Sara nak bzan xaa.
Kwaanzee lee Abimelec,
xaa nak rey Gerar,
ngunabeyy xaa nke zhiin lo xaa zee yaxii xaa Sara gak sa xaa.
3 Nu ngu tub yaal mchaa lextoo Abimelec nu lee Dios ngunii lo xaa:
—Nal yet lu nel ngwnaa kwaan mzen lu nak me nkano xaabyi.
4 Nu lee Abimelec namkanot me nu nzhé xaa:
—Xaa Nabeyy,
napa nel nle lu xgab gut lu re nu,
nik tub kwaan nawent nakalet nu.
5 Nanét xaa lo na,
sa xaa nak me.
Lee xaa né lo na:
“Lee me nak bzan na” nu noka lee me né lo na:
“Bzan na nak xaa”.
Nu naz leen lextoo na,
mle na xgab le na kwaan wen nu namlet na nik tub kwaan nawent lo me.
6 Nu lee Dios mkeb lo xaa lo mkaal:
—Na ne wen doo ngle luya kwaan dub lextoo lu,
kwaanzee namlat na ngal lu me,
zee nangakt lu xaa ngzeb jwalt lo na.
7 Lee nal zare sa xaabyi ba,
nel lee xaa nak xaa nzaa kwent kwaan nzhé na lo xaa,
zee nii xaa lo na kwent cheen lu zee ban lu.
Nu chelee lu nazeret lu me,
¡lu nu re xaa lu telise yet!
8 Zee lee Abimelec nguxche garziil doo nu mrezh xaa re xaa nke zhiin lo xaa zee mzaa xaa kwent re kwaan mchaa lextoo xaa.
Gorna mbin re xaaya,
mzheb doo re xaa.
9 Zee mrezh Abimelec Abraham nu nzhé xaa:
—Wii,
¿cho kwaan mle lu?
¿Xana kwaan nawent mle na lo lu,
zee snee nzeno lu jwalt kwaan naro doo lo na nu lo re xaa nabeyy na lo?
¡Kwaane nanzhaalt ngle lu!
10 ¿Chozhiin mle lu kwaane?
¿Cho kwaan mle lu xgab?
11 Nu lee Abraham mkeb:
—Na mle xgab,
ke nik tub xaa nazhebt ne Dios nee nu gut xaa na zee kib xaa sa na.
12 Wli na,
lee me nak bzan na,
nak me xinn xuz na,
per lee me nanakt xinn xnaa na,
kwaanzee mka na me.
13 Gorna lee Dios mle mroo na xkizhyo na,
lee na ngunaab lo me,
loka pa zhin me zee yé me:
“Lee na nak bzan me”.
14 Nu lee Abimelec mzen ngoon nu mbakxiil nu re xaa nke zhiin,
xaabyi nu ngwnaa nu mzaa xaa re ma nu re xaa lo Abraham.
Nu noka mzere xaa xngwnaa xaa.
15 Nu nzhé xaa:
—Dubse nee nak pa nabeey na,
zee kweey lu pa yo lu.
16 Lee lo Sara nzhé xaa:
—Lee lo bzan lu mza na tub mil demi plat nu kwaane nlu ke nik tub kwaan nawent zer le na lo lu;
nu snee nii wen xaa lu.
17 Zee lee Abraham ngunii lo Dios:
—Sekwen Abimelec nu sa xaa.