Dios mluux yezh Sodoma nu Gomorra
19
Ngol mzhel yizhyo,
lee rop mandad mzhin yezh Sodoma;
nu lee Lot nzob roo yezh kwaan re xaa nak zhiin.
Nu gorna mlu rop xaa lo xaa zee nguxso xaa nu ngunii xaa dix lo xaa nu mkichxub xaa axta mla lachuzh xaa lo yo.
2 Nu nzhé xaa:
—Naab na zee lakeka gu garli na nawzhe nu sbaa zee zet gu nii gu;
nu yee garziil zee nya gu.
Per lee xaa nzhé:
—Aa,
dixkix lu,
per lee nu gaa roo naz.
3 Per lee Lot mle jwers zee mlake mandad garli xaa.
Nu gorna mlaz xaa,
lee Lot mdexkwaa yat nzhob xtil nu mdexkwaa re kwaan ndaw xaa.
Zee lee rop xaa ndaw xchee.
4 Nu gorna lee xaa nya gaa,
lee re xaa yezh mzhin,
xaa mad nu xaa gox nu mlo xaa welt cho yoo.
5 Nu dublegan nzhé xaa lo Lot:
—¿Ma xaa mzhin garli lu nee nawzhe?
¡Loo xaa,
nzhekla nu kano nu xaa!
—Naab na lo gu wech,
ke nalet gu kwaan nawent kwaan lee xaa.
8 Lee na nkano chop xchaap na mad mad,
me zer kano nik tub xaabyi,
zee ko na mad zee kano gu mad nu le gu kwaan nzhekla gu kwaan lee mad.
Per lee xaa kwaan mzhin garli na,
nalet gu nik tub kwaan lo xaa,
nel nzhaal kanap na xaa.
9 Nu lee re xaa mkeb:
—¡Bachi baa!
¿Cho nak lu zee né lu nen cho kwaan le nu?
Nixa nanakt lu xaa nu.
Lee nal mas nawent le nu lu lo rop xaa ba.
Nu nebse mzobya xaa Lot,
zee mlebi xaa blii.
10 Nu lee mandad cheen Dios mxal roo blii,
mre Lot nu mcheep xaa Lot naz leen yoo nu msaaw xaa roo blii.
11 Nu msaaw mandad garlo re xaa nzo naz tich,
zee nagarlot reep xaa naz leen yoo.
12 Nu zee lee mandad cheen Dios nzhé lo Lot:
—¿Che nkanora lu masra sawlizh lu nee?
Zee loo re xgann lu,
xchaap lu nu xuzh lu,
bloo re xaa nee nu gwa zit,
13 nel luux nu yezh ne.
Nu mbin Xaa Tubka Nak re kwaan nawent cheen re xaa yezh ne,
kwaanzee mxaal xaa nu zee luux nu yezh ne.
14 Zee lee Lot ngwa nii lo xaa gak xuzh xaa nu nzhé xaa:
—Zoza broo yezh ne,
nel Dios merla luuxa.
Per lee xaa gak xuzh Lot namlet kas kwaan kanii xaa.
15 Nu garziilaka lee mandad nzhé:
—Lot,
zoza be sa lu nu rop xchaap lu,
o ¿che nzhekla lu yet lu kwaan rese xaa yezh ne?
16 Nu nel naxen nzo Lot,
zee lee mandad mzen yaa Lot kwaan xngwnaa xaa nu xchaap xaa,
nel lee Xaa Tubka Nak mkano yalnles kwaan Lot,
nu mloo xaa xaa roo yezh.
17 Nu gorna nzola xaa roo yezh,
zee lee tub mandad nzhé:
—¡Brexonn!
¡Kanap lu!
Nawiit lu naz tras nel cho kwaan gak leen yezh.
Zyaa leen yi,
chelee lu nzhekla lu ban lu.
18 Nu lee Lot nzhé:
—¡Aka na,
naab na lo gu!
19 Gu kale zyen doo kwaan lo na nu kale gu kwaan wen doo lo na nu mkanap gu na,
per nyent mod nya na naz yi,
nel napa kayet na.
20 Gax nee nzhi tub yezh chuut,
nal rexonn na zee zoza zhin na,
zee nyent cho kwaan gak na leen yezh chuut ba.
21 Zee lee tub mandad nzhé:
—Gon na xtizh lu nu le na kwaan ngunaab lu lo na.
Naluuxt na yezh kwaan né lu lo na.
22 Zoza zyaa baa,
nel nyent mod le na nik tub kwaan chelee lu nazhint lu baa.
24 Zee lee Dios,
Xaa Tubka Nak,
msela ki sufre yezh Sodoma nu Gomorra,
kwaan mroo naz yiba.
25 Nu mluux Dios yezh nu re xaa yezh nu rese kwaan nzeb lo yizhyo.
26 Zee lee xngwnaa Lot mzere yenn naz tras nu mlaach me yezh,
zee ta ngok me ke zed.
27 Lee garziil ze ngwa Abraham naz yi paro mzo xaa kwaan Xaa Tubka Nak.
28 Nu mlaach xaa naz Sodoma nu Gomorra nu dubse leen yezh ba mlu lo xaa,
nguxoob zhen modxa nyixoob zhen leen gor.
29 Sbaa mod mluux Dios yizhyo ba paro ngu Lot.
Nu lee Dios mselazh Abraham nu zee mloo xaa Lot paro mluux xaa yezh.
Lot kwaan rop xchaap
30 Zee lee Lot nzheb lake Zoar,
zee nya xaa kwaan rop xchaap xaa naz yi paro yo xaa naz leen yiloo.
31 Ngu tub mbizh,
lee xchaap xaa,
me yilo nzhé lo me gwluzh:
—Xuz be nak tub me gol.
Nu nel nyent xaabyi ka be nee modxa naka,
32 lee nal,
snee le be:
Zaa be xis ub go xuz be zee sezuzh be xaa nu zee gaano be xuz be,
zee kano be xinn xaa.
33 Nu mchoola yizhyo zee mzaa me xis ub ngu xuz me.
Nu lee me yilo ngoot kwaan xuz.
Nu lee xuz me nanzeent ngoot kwaan lee me nu nixa namzeent xaa gorna nguxche me.
34 Lee stub mbizh lee me yilo nzhé lo me gwluzh:
—Nel nawzhezee ngootno na xuz be.
Lee noka nawzhe sezuzh be me,
zee gaano lu me,
zee snee rop be kano xinn me.
35 Nu mzaa me xis ub ngu xuz me nu lee me gwluzh ngootno xaa,
per lee Lot namzeent ngootno me,
nixa namzeent xaa gorna nguxche me.
36 Nu snee lee rop xchaap Lot mbeyxinn xuz.
37 Lee me yilo mkano tub xaa le Moab,
xaa nak xuz re xaa yizhyo Moab,
xaa nzho baa mbizh ne.
38 Nu noka me gwluzh nkano tub xaa le Ben-ammi,
xaa nak xuz re xaa yizhyo Ammon,
xaa nzho baa mbizh ne.