Dios nzhé lo Abraham zee kano xaa tub madoo
18
Lee tub mbizh mlu Xaa Tubka Nak lo Abraham naz xan xkag zin Mamre nu lee mbizh ne kan rolta mbizh nzob xaa roo yoo ler cheen xaa.
2 Zee lee Abraham mlep yek nu mlu chon xaa lo xaa.
Nu gorna mlu xaa lo xaa zee nguxso xonn xaa nu mkichxub xaa axta mla lachuzh xaa lo yo lo xaa nu nzhé xaa:
3 —Dix xaa nabeyy.
Naab na lo lu zee nanyat gu.
4 Nu cheleeya nzak gu wena,
yaxi na cheep nis zee zet gu nii gu,
zee kwaz gu tub rat xan yag ne.
5 Nu noka yaxi na kwaan gaw gu,
zee ka gu jwers,
zee nzho mod ze gu,
nel mzhin gu garli na.
Nu lee yon xaa ne nzhé:
—Wen dooya.
Le lu re kwaan né lu.
6 Nu zee lee Abraham mreep xonn leen yoo paro nzo Sara nu nzhé xaa:
—Le prad zen tub gal kil arin kwaan wen nu tuuzh koob zee kee yat nzhob xtil.
7 Nu zee lee Abraham mrexonn ngwa leen korrel nu mzen xaa tub la ngoon yeen,
ma yeen nu ma nachaa lo rese ma.
Nu mzaa xaa ma lo xaa nke zhiin lo xaa zee dexkwaa xaa ma gawxwe xaa.
8 Noka mzaa Abraham nizh nu kes nu ngoon yeen ma mdexkwaa xaa.
Nu liger nzo xaa dubse gorna ndaw yon xaa ne ma,
xan xkag zin Mamre.
9 Nu ngunabdizh xaa:
—¿Ma Sara,
sa lu?
Nu lee xaa mkeb:
—Lee me nzho leen yoo ler.
10 Zee nzhé xaa:
—Stub liin bare na yal na lo gu stub welt,
lee sa lu nkanola mad.
Nu lee Sara mzo tich Abraham roo yoo ler kakenzha re wdizh.
11 Nu lee Abraham rop Sara ngoxla.
Nu lee Sara mdedla liin kwaan kano me mad.
12 Nu lee Sara nayetra lo xkit nzo nu mle xgab:
“¿Xomod nzhaal yakla na,
nel lee rop sa nu ngoxla zee kano nu madoo?”
13 Zee nzhé Xaa Tubka Nak lo Abraham:
—¿Chozhiin mxizh Sara?
¿Che nanlet me xgab nzho mod kano me tub xinn me sbaa ngoxla me?
14 ¿Kas nzho kwaan nagan kwaan nagarlot le Xaa Tubka Nak,
nzak lu?
Lee stub liin yaad ne bare na yal na garli lu stub welt,
lee gu nkanola mad.
15 Gorna mbin me kwaane,
Sara mzheb nu namlet me xgaba,
zee nzhé me:
—Nakaxizht na.
Lee Dios mkeb nzhé:
—Ne na,
lee lu mxizh.
Abraham ngunaab lo Dios kwent cheen Sodoma
16 Zeera lee yon xaa ngwa lo Abraham,
nguxso nu mlaach xaa naz Sodoma nu lee Abraham nzha kwaan lee xaa tub rat.
17 Nu lee Xaa Tubka Nak mle xgab:
“Nzhaal yé na lo Abraham cho kwaan le na,
18 nel lee xaa gak xuz tub yezh naro nu ngezh.
Nel mza na diizh nii wen na lo xaa dubse yizhyo.
19 Nel na mleey xaa zee seed xaa xgann xaa nu re dii cheen xaa,
zob xaa diizh re kwaan nii na nu le xaa rese kwaan wen nu kwaan nali,
zee le na re kwaan myaan na.”
20 Zee lee Xaa Tubka Nak nzhé:
—Nzhon na zyen doo kwaan cheen re xaa Sodoma nu Gomorra;
nu tubka kale re xaa kwaan nawent.
21 Lee nal ya na baa,
yasewii na zee laach na nen che wli re kwaan kale xaa,
nak kwaan nawent,
zee sbaa ne naya.
22 Zee lee rop mandad ngwa naz Sodoma nu lee Abraham nzo kwaan Xaa Tubka Nak.
23 Nu lee Abraham mbii gax nu nzhé:
—¿Che zluux lu xaa nali tubka kwaan xaa nawent?
24 Chol nzho choobchii xaa nali leen yezh,
¿che zluux luya?
¿Che nalest la lu ne lu yezh kwent cheen choobchii xaa nali,
xaa nzho lo re xaa?
25 Telise naluuxt lu xaa nali lo re xaa nawent.
Telise nalalt le lu kwaan rop xaa ne.
¡Nalet luya!
Nel nali naab lu kwent lo yizhyo ne.
¡At lu nle re kwaan wen!
26 Zee lee Xaa Tubka Nak mkeb:
—Chelee na yizhal na choobchii xaa wen leen yezh Sodoma,
kwent cheen re xaa ne naluuxt na yezh.
27 Per Abraham mbare nzhé:
—Dios,
lee na nii lo lu stuba.
Lu nak Dios nu lee na nak nebse tub myet.
28 Per chol nzho choobgaayaka xaa nali,
che nebse chol nyent zgaay xaa,
¿che zluux lu yezh?
Lee Dios mkeb:
—Chelee na yizhal na choobgaay xaa nali,
naluuxt naya.
29 Nu lee Abraham nzhé stub welt:
—¿Chol nebse nzho choo xaaya?
Nu lee xaa mkeb:
—Kwent cheen choo xaa naluuxt na yezh.
30 Nu lee Abraham nzhé:
—Nayiit lu chelee na seetaka nabdizh na lo lu.
Per chol yizhal galbchii xaa nali,
¿che zluux lu yezh?
Nu lee Dios mkeb:
—Nixa kwaan galbchii xaa naluuxt na yezh.
31 Lee Abraham seetaka kanabdizh nu nzhé:
—Dios,
kanabdizh doo na lo lu,
¿per cho kwaan gak chol nebse nzho tub gal xaa nali?
Nu lee Dios mkeb:
—Nixa kwent cheen tub gal xaa naluuxt na yezh.
32 Lee Abraham mbare ngunabdizh stuba:
—Naab na lo lu,
Dios,
nayiit lu lo na,
nel stub weltaka nabdizh na lo lu,
¿cho kwaan le lu chol nebse nzho chii xaaya?
Nu lee Dios mkeb:
—Nixa kwent cheen chii xaa naluuxt na yezh.
33 Ngulo ngunii Xaa Tubka Nak lo Abraham,
zee nya xaa nu lee Abraham mbare nya leen li xaa yoo ler.