Lee beey mlu myaan Abram rop Dios tub trat
17
Lee Abram nzho tap gal chiinmtap liin gorna mlu Xaa Tubka Nak lo xaa nu nzhé xaa:
—Na nak Xtios lu xaa nzhak ndil.
Nu nali ze lu kwaan na.
2 Nu yaan na xtrat na kwaan lu.
Nu zyen doo le na re dii cheen lu.
3 Zee lee Abram mkichxub nu axta mla lechuzh xaa lo yo nu ngunii Dios lo xaa nu nzhé xaa:
4 —Lee nal le na tub trat kwaan lu nu gak lu xuz zyen doo yezh.
5 Nu narooletra lu Abram,
lee nal roole lu Abraham;a
nel le na zee gak zyen doo dii cheen lu nu yo xaa zyen yezh.
6 Nu le na zyen doo dii cheen lu.
Nu lo re dii cheen lu roo zyen doo yezh nu noka lo re dii cheen lu yo xaa gak rey.
7 Le na tub trat kwaan lu nu kwaan re dii cheen lu,
tub trat kwaan tira nu gak na Xtios lu nu gak na Dios cheen re dii cheen lu.
8 Za na yizhyo Canaán lo lu nu lo re dii cheen lu,
paro nzho lu,
rese pa mkanze lu,
zee gaka xcheen gu tira.
Na gak Xtios rese dii cheen lu.
9 Zee ngunii Dios stub welt lo Abraham:
—Lee lu zob diizh kwaan myaan na kwaan lu,
lu nu re dii cheen lu.
10 Kwaane nak trat kwaan myaan na kwaan lu nu kwaan re dii cheen lu;
nu rese xaabyi xaa nzo lo gu yo beey.
11 Nkin choog lu tik yed cho gu,
zee mlu myaan na kwaan gu.
12 Gorna yo mad xon mbizh,
nkin yo rese madbyi beey cheen lu,
sbaaka nkin le lu lo rese xaa lu,
mad ngol garli lu nu re mos kwaan mzi lu kwaan demi lo stub naz xaa zit.
13 Kin yo rese xaa beey,
xaa gal garli lu nu xaa zii gu kwaan demi.
Snee mod luu myaan na kwaan lu tira.
14 Per lee re xaa nayot beey,
nanzhaalt yo xaa lo re gu,
nel namlet xaa mod myaan be.
15 Nu noka nzhé Dios lo Abraham:
—Nu lee Sarai,
sa lu,
naletra me Sarai,
lee nal roole me Sara.b
16 Nu nal za na tub mad lo me nu le na gak zyen doo dii cheen me nu lee me gak xnaa zyen xaa non nu re yezh.
17 Zee lee Abraham mkichxub axta mla lachuzh xaa lo yo.
Nu mxizh xaa nu mle xaa xgab:
“¿Che nel nzhora mod kano na mad nel nzhola na tub gayoo liin?
¿Nu che nel nzhora mod kano Sara mad,
me nzhola tap gal chii liin?”
18 Zee nzhé Abraham lo Dios:
—Wen doo chelee Ismael zo kwaan lu.
19 Lee Dios nzhé:
—Wlipa na,
lee sa lu Sara zan tub mad nu koole lu mad Chak.c
Nu lee na yaan kwaan lee xaa nu kwaan re dii cheen xaa.
20 Nu lee kwaan Ismael,
noka mbin na xtizh lu nu nii na wen lo xaa,
zee xen xaa nu gak zyen dii cheen xaa.
Nu gak xaa xuz chiibchop xaa non nu le na xaa tub yezh naro.
21 Per lee na yaan kwaan Chak,
xaa zan Sara liin yaad ne.
22 Lee gorna ngulo ngunii Dios lo Abraham,
zee nya xaa.
23 Nu leeka mbizh zee lee Abraham mlo beey Ismael;
nu noka mlo xaa beey rese xaa ngol leen li xaa nu re xaa mzi xaa kwaan demi nu rese xaa nke zhiin lo xaa,
mod nzhé Dios lo xaa.
24 Nu nzhap Abraham tap gal chiinmtap liin gorna mlo xaa beey leeka lee xaa.
25 Nu nzhap Ismael chiin liin gorna ngu xaa beey.
26 Nu leeka mbizh zee ngu Abraham beey nu Ismael,
xgann xaa
27 nu rese xaabyi li xaa,
xaa ngol leen li xaa nu xaa zit,
xaa mzi xaa kwaan demi,
ngu beey.