Ismael, xgann Agar nu Abram
16
Sarai nak sa Abram nu nagarlot kano me mad.
Nu lee me nkano tub me nke zhiin lo me,
me le Agar.
Lee me nak tub me Egipto.
2 Zee nzhé Sarai lo Abram:
—Ne lu,
lee Xaa Tubka Nak mle zee nagarlot kano na mad.
Lee nal naab na lo lu,
kano lu Agar,
zee nen che nakanot me mad,
zee gak mad xiin na.
Nu lee Abram mle kwaan ngunaab Sarai.
3 Nu lee Sarai mzaa Agar lo Abram,
leezha nzhala chii liin nzho Abram yizhyo Canaán.
4 Zee mkano Abram me nu mbeyxinn me.
Nu gorna mzeen me nakxinn me,
zee nangunewentra me Sarai.
5 Zee lee Sarai nzhé lo Abram:
—Lu mle zee Agar nanewentra na.
Nu ne lu lee na mza Agar lo lu.
Lee nal nakxinn me,
zee gro nle me lo na.
Kwaanzee naab na zee lee Xaa Tubka Nak,
nii cho be nkano rason.
6 Per lee Abram mkeb:
—Le lu me kwaan nzhekla lu,
kwaanzee lee me nak me nke zhiin lo lu.
Nu zee namkano nawentra Sarai me.
Zee mroo me nya me.
7 Nu lee Mandada cheen Xaa Tubka Nak nguzhal me wen,
roo tub xlen,
naz kwaan nzha Shur.
8 Nu nzhé xaa:
—Agar,
me nke zhiin lo Sarai,
¿pa naz nze lu?
Nu ¿pa naz ya lu?
Nu lee me nzhé:
—Lee na mxonn lo Sarai,
me nke na zhiin lo.
9 Zee lee mandad cheen Dios ngunii:
—Bare lo me nke lu zhiin lo nu bin rese kwaan né me lo lu.
10 Noka nzhé Mandad cheen Xaa Tubka Nak:
—Le na zee gak zyen doo dii cheen lu nu nyent cho nzho mod lab re dii cheen lu.
11 Noka nzhé Mandad cheen Xaa Tubka Nak lo me:
—Lee nal nakxinn lu nu gorna gal xinn lu,
koole lu mad Ismael,b
nel mbin Xaa Tubka Nak mbinn lu.
12 Nu lee xaa gak tub xaa ngezh,
modxa ngezh tub gway.
Nu dil xaa kwaan re xaa nu re xaa dil kwaan lee xaa.
Nu liib xaa lextoo xaa dil xaa paro nabeyy xaa kwaan leeka wech xaa.
13 Nu mzeet me le Xaa Tubka Nak nu nzhé me lo xaa snee:
“Lu nak Dios kwaan ngwii lo na”.
Snee nzhé me:
“¡Mlu Dios lo na nu seetaka mban na!”
14 Zee sbaa mloole me bzo,
“Bzo cheen Xaa Mban,
xaa ngwii lo na”.
Nu bzo ba nzob xsaw yezh Cades nu Bered.