Dios myaan kwaan Abram
15
Ngulo mded re kwaan ba,
lee Xaa Tubka Nak ngunii lo Abram lo tub kwaan mlu lo xaa nu nzhé xaa:
—Nazhebt lu Abram.
Na nak mod tub kwaan saaw lu lo dil;
nal za na zyen doo kwaan lo lu.
2 Zee mkeb Abram lo Dios,
Xaa Tubka Nak:
—¿Cho le na re kwaan zaa lu lo na?
Nankanot na nik tub xgaan na,
xaa kayaaya.
Xaa kwaan kayaa reya nak Eliezer,
xaa yezh Damasco.
3 Nu nzhé Abram:
—Namzaat lu nik tub xgaan na,
kwaanzee tub xaa nke zhiin lo na lake re xcheen na lo,
gorna yet na.
4 Zee lee Xaa Tubka Nak nzhé lo Abram:
—Xaa kayaa re xcheen lu gak mer xgann lu nu lee Eliezer,
xaa nke zhiin lo lu,
nakayaata.
5 Zee mloo Dios Abram naz jwer nu nzhé xaa:
—Wii naz yiba.
Nyent cho nzho mod lab rese mbal,
ma nzob naz yiba,
nel zyen doo ma.
Sbaaka gak zyen doo re dii cheen lu.
6 Kwaanzee Abram mwii lo Xaa Tubka Nak,
zee Dios mkayaa xaa mod tub xaa nali.
7 Nu nzhé Dios:
—Na nak Xtios lu,
na mlo lu naz yizhyo Ur cheen xaa Caldea,
zee za na yizhyo ne lo lu.
8 Abram mkeb lo Dios:
—¿Xomod ne na,
lee lu wlipa zaa lu tub mad lo na?
9 Zee lee Dios nzhé:
—Gwaxii tub re ma ne,
ma nzhap chon liin:
tub la bak yeen,
tub chib gol nu tub mbakxiil mach nu noka tub palom nu tub ngog zee yaan be trat.
10 Zee lee Abram mbe rese ma ne lo Dios nu mlerol xaa ma nu mlek xaa rol ma lo zrol ma,
per lee palom nu ngog namlerolt xaa.
11 Nu lee re ngolbech nla lo re ma ngut,
per lee Abram tubka nchobla ma.
12 Ngulo ngwaaz mbizh nu mla yalchool,
zee mzen mkaal doo Abram.
Nu lo yalnakaw zee mzheb xaa.
13 Zee lee Xaa Tubka Nak nzhé lo xaa:
—Lee re dii cheen lu nya yo tub yezh ben nu baa ke xaa zhiin kwenta ma nu bid doo ded xaa dubse tap gayoo liin.
14 Nu leeka na ted bid yezh kwaan le xtii lu sbaa.
Nu gwluzh lee dii cheen lu roo kwaan re kwaan non.
15 Per lee lu gak lu tub xaa gol nu wen gaach lu nu zhaal lu kwaan re xey lu.
16 Nu yilo zhin tap gayoo liin,
lee re dii cheen lu bare lo yizhyo ne,
nel nal seesa zer yo kwaan nakap lo re xaa Hesbón.