Abram mkiib Lot lo re rey
14
Lee re mbizh zee ngu dil lo re rey nu nak xaa chop tant.
Lee tub naz xaa nak:
Amrafel nak rey Sinar,
Arioc nak rey Elasar,
Quedorlaomer nak rey Elam nu
Tidal nak rey Goim.
2 Lee re xaa ne mdil kwaan:
Bera nak rey Sodoma
Birsa nak rey Gomorra,
Sinab nak rey Adma,
Semeber nak rey Zeboim
nu rey cheen Bela kwaan nak Zoar.
3 Nu gaay rey ne mzhaal laach roo yuu pa le Sidim,
gax roo Nistoo Ngut.
4 Nu dubse chiibchop liin nabeyy rey Quedorlaomer lo re rey ne nu stub liin lee re gaay rey ne namlet kwaan mxaal rey Quedorlaomer.
5 Zee lee stub liin mzhin rey Quedorlaomer nu re rey,
xaa nzho xta xaa nu mle xaa gan lo re xaa Refaíta naz Astarot Karnaim nu lo re xaa Zuzita naz Ham nu noka lo re xaa Emita naz Save-quiriataim.
6 Nu noka mle xaa gan lo re xaa Horeo naz yi Seir nu axta lo laach Parán,
kwaan nzhikwaa gax lo yizhyo bizh.
7 Nu zee mbare rey Quedorlaomer nyaad kwaan re xaa xaa nu mzhin xaa Enmispat,
kwaan noka le Cades.
Nu mluux xaa rese xcheen re xaa Amalecita nu sbaaka mle xaa kwaan re xaa Hesbón,
xaa nzho yizhyo Hazezontamar.
8 Nu lee gaay rey cheen re yezh ne:
Sodoma,
Gomorra,
Adma,
Zeboim nu Bela ngwa Laach cheen Sidim,
kwaan nzhikwaa gax roo Nistoo Ngut,
paro mdil xaa
9 kwaan dap rey cheen yezh:
Elam,
Tidal,
Amrafel nu Arioc.
Tap rey mdil kwaan gaay rey.
10 Nu dubse yizhyo Sidim nzho zyen doo yeer nech paro nzhib petrol nu;
zee mxonn rey Sodoma nu rey Gomorra zee mla zyen xaa leen yeer ba nu lee stub naz xaa mxonn naz yi.
11 Zee mzen xaa rese kwaan nzho Sodoma nu Gomorra nu mroo xaa baa.
12 Noka mbe xaa Lot,
xich Abram nu re kwaan nkano xaa,
nel baa ngu xaa.
13 Ngu tub xaa mle gan mxonn zee ngwa xaa lo Abram,
xaa hebreo,
zee mzaa xaa kwent cheen xich xaa Lot.
Nzho xaa naz yi,
xan xkag zin Mamre.
Mamre nak tub xaa Hesbón.
Escol nu Aner nak wech xaa.
Nu lee xaa myenn Abram.
14 Nu mbin Abram lee xich xaa Lot nyano re xaa.
Nu Abram mrezh re xaa,
xaa nke zhiin lo Abram,
zee ya xaa lo dil.
Lo re xaa nak xaa chon gayoo chiinmchon.
Mroo xaa kwaan Abram nu mrenal xaa dap rey axta yezh cheen Dan.
15 Nu gorna ngok yaal,
lee Abram nu re xaa Abram mzhin xlaan lo dap rey nu mdil xaa nu zee mxonn re rey nu mreke xaa tich xaa axta yezh Hoba,
naz ya yezh Damasco.
16 Nu mkiib xaa re kwaan mbe xaa nu noka Lot,
xich xaa nu re kwaan nzhap xaa nu noka sa xaa nu stub naz re xaa.
Melquisedec ngunii wen lo Abram
17 Gorna mbare Abram,
ngulo mle xaa gan lo dil kwaan Quedorlaomer nu noka re rey kwaan nzo kwaan lee xaa,
zee mroo rey cheen Sodoma mkayaa xaa lo laach cheen Save,
kwaan nak Laach cheen Rey.
18 Zee lee Melquisedec,
xaa nak rey cheen Salem nu xaa nak ngwleyy cheen Dios Naro mloo yat nu xis ub.
19 Nu ngunii xaa wen lo Abram nu nzhé xaa:
Wen mkanap Dios lu,
xaa Naro nak,
xaa mdexkwaa yiba nu yizhyo,
20 Gool be lo Dios,
xaa Naro nak,
xaa mle zee mle lu gan lo re xaa mdil kwaan lu.
—Zaa re xaa na lo na nu lee re kwaan lake lo lu.
22 Nu lee Abram mkeb:
—Mcheroo na lo Xaa Tubka Nak,
Xaa Naro nak,
xaa mdexkwaa yiba nu yizhyo,
23 zee nakayaat na nik tub xcheen lu.
Nazent na nik tub le korre kwaan nkadoo tich xkelyed lu,
zee nayét lu mle rik lu na.
24 Nebse kayaa na re kwaan ndaw re xaa na nu re kwaan nzhaal yazo Aner,
Escol nu Mamre,
lee xaa myenn na nu mle xaa yud na.