Abram nu Lot mrexcho
13
Gorna mroo Abram naz Egipto kwaan sa xaa nu rese kwaan nzhap xaa,
mbare xaa yizhyo Neguev.
Nu xich xaa Lot nzha kwaan lee xaa.
2 Abram nak tub xaa rik doo nel nkano xaa or,
plat nu zyen doo ma.
3 Nu mroo xaa Neguev,
cheepga cheepga mzhin xaa yezh Betel nu mzhin xaa paro mzob xaa yoo ler cheen xaa yilo,
xsaw Betel nu Hai,
4 paro mdexkwaa xaa lo mdo yilo nu baa mzeet xaa le Xaa Tubka Nak.
5 Nu noka Lot,
xaa mze kwaan Abram ngok tub xaa rik.
Mkano xaa mbakxiil,
ngoon nu yoo ler nu mkano xaa xaa mke zhiin lo xaa.
6 Nu lee yizhyo paro nzho rop xaa nagaat pa kwii xma xaa nel zyen doo ma nzhap xaa,
zee nyent mod yo xaa tuka pa.
7 Lee xaa nkanap xpakxiil Abram mdil xaa kwaan xaa nkanap xpakxiil Lot.
(Nu lee re xaa Canaán nu re xaa Ferezeo seetaka nzho baa.)
8 Zee ngu tub mbizh Abram nzhé lo Lot:
—Lu nu na nak xich be.
Nawent yo be dil lo xaa nkanap xma lu nu xaa nkanap xma na.
9 Nzho dubse yizhyo nee,
zee kwey luya nu naab na lo lu zee rexcho be.
Chelee lu ya lad li,
lee na ya lad beg nu chelee lu ya lu lad beg,
lee na ya lad li.
10 Zee lee Lot ngwii dubse yizhyo kwaan nzhikwaa naz roo Yuu Jordán,
kwaan nzhin axta Zoar.
Nu lee yizhyo ba nzho nal nis nu nak kwent yilo Edén.
Nu noka naka kwenta Egipto nu snee ngoka gorna zer luux Xaa Tubka Nak Sodoma nu Gomorra.
11 Nu lee Lot mleey yizhyo Jordán nu nya xaa pa nlen mbizh paro nzo xaa.
Nu snee mrexcho Abram nu Lot.
12 Zee lee Abram mlake naz Canaán nu lee Lot nya ngu naz yizhyo kwaan nzhikwaa gax yezh Sodoma,
13 paro nzho re xaa nakap doo,
xaa nle kwaan naxinn lo Dios.
14 Gorna ngulo mya Lot,
lee Xaa Tubka Nak nzhé lo Abram:
—Paro nzo lu baa,
wii wen naz paro nlen mbizh nu paro nyaz mbizh nu naz yat nu naz ya.
15 Nel na za dubse yizhyo kwaan nlu lo lu nu gaka tira xcheen lu nel na zaya lo lu nu re dii cheen lu.
16 Nu dii cheen lu le na zyen doo kwenta yide kwaan nroo lo yo;
nu nyent cho nzho mod lab yide cheen yo,
sbaaka nyent cho nzho mod lab dii cheen lu.
17 Guxso nu bze lo yizhyo rese pa,
nel na zaya lo lu.
18 Snee lee Abram mlep yoo ler nu nzha naz yizhyo Mamre,
kwaan nzhikwaa yizhyo Hebrón,
pa nzho yag zin.
Nu baa lee Abram mdexkwaa lo mdo nu mzeet xaa le Xaa Tubka Nak.