Dios mrezh Abram
12
Ngu tub mbizh Xaa Tubka Nak nzhé lo Abram:
—Laa lazh lu nu li xuz lu,
zee ya lu yizhyo kwaan lu na lo lu.
2 Le na lee re xtii lu gak tub yezh naro doo;
nu nii wen na lo lu,
zee gak lu tub xaa kwib xtizh
nu gak lu xaa nii wen stub naz xaa.
3 Nii wen na lo xaa nii wen lo lu
nu xobde na lo xaa xobde lo lu.
Le na kwaan wen lo re xaa yizhyo kwent cheen lu.
4 Abram mroo modxa nzhé Xaa Tubka Nak lo xaa nu noka Lot nzha kwaan lee xaa.
Nu lee Abram nzho chon gal nzho chiin liin gorna mroo xaa Harán nu nya xaa yizhyo Canaán.
5 Nu lee Abram mbe sa xaa Sarai nu xich xaa Lot nu re kwaan nzhap xaa nu rese xaa mke zhiin lo xaa.
Gorna mzhin xaa Canaán,
6 mze Abram dubse yizhyo ne nu mzhin xaa naz yezh Siquem,
pa nzo yag zin ndok xkizhyo More.
Nu lee mbizh zee lee re xaa Canaán seetaka mzo yizhyo ba.
7 Nu baa lee Xaa Tubka Nak mlu lo Abram nu nzhé xaa:
—Lee yizhyo ne za na lo re dii cheen lu.
Zee lee Abram mdexkwaa lo mdo lo Xaa Tubka Nak,
nel baa mlu xaa lo xaa.
8 Nu zee nya xaa tub yi kwaan nzhikwaa naz pa nlen mbizh lo yezh Betel nu baa mzob xaa yoo ler cheen xaa.
Nu lee Betel nzhikwaa pa naz nyaz mbizh paro mzob xaa yoo ler cheen xaa nu lee yezh Hai nzhikwaa paro nlen mbizh.
Nu lee Abram mdexkwaa tub mdo nu ngunii lo Dios.
9 Nu zee mroo Abram baa,
zee cheepga cheepga mzhin xaa yizhyo Neguev.
Abram nzha Egipto
10 Leezha ngu xaa Canaán,
zee mla win naz yizhyo ba,
nu zee lee Abram nya naz Egipto nel nyent kwaan gaw xaa naz pa ngu xaa.
11 Lee gorna mer nzha zhin xaa Egipto,
Abram nzhé lo sa xaa Sarai:
—Wii,
ne wen na lee lu nak tub ngwnaa,
me chul doo nlu.
12 Nu gorna lee re xaa Egipto wii lo lu nu yé xaa lo re wechxinn xaa:
“Ngwnaa ne nak sa xaa ba”.
Napa lee re xaa gut na,
lee lu ban nu lake lu kwaan lee xaa.
13 Kwaanzee yé lu:
“Lu nak bzan na”,
zee naguta xaa na nu wen deed na.
14 Lee gorna mzhin Abram Egipto,
lee re xaa Egipto nzhé:
“¡Sarai chul doo nlu!”
15 Noka mwii re xaa nzo lo xaa ngok faraón,
xaa nabeyy Egipto nu noka nzhé xaa:
—¡Lee ngwnaa ne nak tub ngwnaa chul doo nzhak!
Zeera ngunabeyy xaa ngok faraón zhino xaa Sarai garli xaa.
16 Nu wen mle xaa ngok faraón lo Abram nel lo Sarai ngwii xaa,
zee mzelazh xaa mbakxiil,
ngoon,
xaa nke zhiin,
ngwnaa nke zhiin,
ngwes nu kamey lo xaa.
17 Lee Xaa Tubka Nak mxaal yalyizh nakap lo xaa ngok faraón nu re xaa li xaa nel mbe xaa Sarai garli xaa.
18 Zee lee xaa ngok faraón mrezh Abram nu nzhé xaa lo xaa:
—¿Cho kwaan kwaane mle lu lo na?
¿Chozhiin nanét lu lee me nak sa lu?
19 ¿Chozhiin né lu lee me nak bzan lu?
Nu mle na xgab chaal na me mod sa na.
¡Lee nal,
sa lu nee,
be me nu zyaa!
20 Zee ngunabeyy xaa ngok faraón re xaa xaa zee koo xaa Abram,
sa xaa nu re kwaan nzhap xaa Egipto.