Yoo ndok Babel
11
Nu lee re mbizh yilo,
lee re myet nii tuka lo diizh.
2 Nu gorna mroo xaa naz pa nlen mbizh nu nguzhal xaa tub laach naz yizhyo Sinar nu mlaz xaa naz ba.
3 Zee nzhé tub xaa lo stub xaa:
—Dexkwaa be ladri nu seyey beya lo ki.
Nu mlexchinn xaa ladri pa mlexchinn xaa ke.
Nu paro mlexchinn xaa ban,
mlexchinn kwaan nzhak kwenta chapapot.
4 Nu nzhé xaa:
—Zaa be tub yezh kwaan tub yoo ndok,
kwaan zhin axta yiba.
Nu nixa narexchot be lo yizhyo nu gak xwa be.
5 Nu zee lee Dios mla mwii lo yezh nu yoo ndok kwaan kaza re myet.
6 Nu nzhé Xaa Tubka Nak:
—Nal tubka nak yezh ne nu nzhedizh xaa tuka lo diizh nu mzelo xaa ke xaa zhiin nu nyent cho luux re kwaan nle xaa xgab le xaa.
7 Lee nal,
le be zee xa gak xgab yek tub xaa nu stub xaa lo re wdizh kwaan nzhedizh xaa,
zee nik tub xaa nalat wdizh kwaan nzhedizh tub xaa yek stub xaa.
8 Nu sbaa mloxcho Xaa Tubka Nak re xaa lo yizhyo;
nu mlaa re xaa namdexkwaatra xaa yezh.
9 Nu kwaanzee mloole xaa yezh Babel nu baa mchee Xaa Tubka Nak xtizh re xaa lo yizhyo nu mreech xaa dubse yizhyo.
Re dii cheen Sem
10 Kwaane nak kwent cheen re dii cheen Sem.
Sem nzho tub gayoo liin gorna ngol xgann xaa Arfaxad,
chop liin leezha ngulo mded nis dox.
11 Ngulo ngol Arfaxad,
lee Sem mbanra gaay gayoo liin nu mkanora xaa xgann xaa nu xchaap xaa.
12 Arfaxad nzho galbchiibgaay liin gorna ngol xgann xaa Sala.
13 Ngulo ngol Sala,
lee Arfaxad mbanra tap gayoo chon liin nu mkanora xaa xgann xaa nu xchaap xaa.
14 Sala nzho galbchii liin gorna ngol Heber.
15 Ngulo ngol Heber,
lee Sala mbanra tap gayoo chon liin nu mkanora xaa xgann xaa nu xchaap xaa.
16 Heber nzho galbchiibtap liin gorna ngol Peleg.
17 Ngulo ngol Peleg,
lee Heber mbanra tap gayoo galbchii liin nu mkanora xaa xgann xaa nu xchaap xaa.
18 Peleg nzho galbchii liin gorna ngol Reu.
19 Ngulo ngol Reu,
lee Peleg mbanra chop gayoo yee liin nu mkanora xaa xgann xaa nu xchaap xaa.
20 Reu nzho galbchiibchop liin gorna ngol Serug.
21 Ngulo ngol Serug,
lee Reu mbanra chop gayoo gazh liin nu mkanora xaa xgann xaa nu xchaap xaa.
22 Serug nzho galbchii liin gorna ngol Nacor.
23 Ngulo ngol Nacor,
lee Serug mbanra chop gayoo liin nu mkanora xaa xgann xaa nu xchaap xaa.
24 Nacor nzho galbyee liin gorna ngol Taré.
25 Ngulo ngol Taré,
lee Nacor mbanra tub gayoo chiinmtap liin nu mkanora xaa xgann xaa nu xchaap xaa.
26 Taré nzho chon gal chii liin gorna ngol Abram,
Nacor nu Harán.
Re dii cheen Taré
27 Snee nak kwent cheen re dii cheen Taré,
xaa ngok xuz Abram,
Nacor nu Harán.
Harán ngok xuz Lot.
28 Ngut Harán yezh Ur yizhyo cheen xaa Caldea,
gorna mbanka xuz xaa.
29 Abram mka Sarai.a
Nu Nacor mka Milca,
me nak xchaap Harán nu bal me nak Isca.
30 Sarai nak me nit,
me nagarlot kano mad.