Ngulo mded nis dox
8
Nu mles lextoo Dios ne Noé nu rese lo ma nzho leen ark.
Nu zee mxaal Dios tub mbi lo yizhyo zee mzelo nis nzeyee.
2 Nu msaaw xaa yizhyo paro mroo nis naro nu msaaw xaa yiba paro mroo yey dox,
zee mlaz nis dox.
3 Nu cheepga cheepga nzeyee nis lo yizhyo.
Gorna mded tub gayoo yirol mbizh,
4 zee mlaz ark yek yi Ararat,
kwaan ngok chiinmchop xche mbee gazh.
5 Nu lee nis mlaz mbizh tub xche mbee chii zeera mlu yek yi.
6 Nu nzha choo mbizh lee Noé mxal roo bentant kwaan mdexkwaa xaa.
7 Nu zee mxaal xaa tub nga,
ma mzobi lo nis zee ne che nzho pa mbizhla.
8 Nu mxaal Noé tub palom zee ne xaa che nzho pa nzho yo bizh.
9 Nu lee palom nyent pa la,
zee mbare ma lo ark,
nel seetaka nzho nis lo yizhyo.
Zee lee Noé mloo yaa nu mla palom yaa xaa,
zee mcheep xaa ma naz leen.
10 Nu mlaz xaa stub gazh mbizh,
zee mxaal xaa palom stub welt.
11 Nu lee palom mbare mzhel yizhyo,
nu nyaadno ma lag olib roo ma,
zee mzeen Noé ke nzhola pa nzho yo mbizh.
12 Nu mlaz xaa stub gazh mbizh nu mbare xaa mxaal xaa palom,
ma nambaretra lo xaa.
13 Zee nzho Noé xoop gayoo tub liin tub xche mbee yilotlaka,
zee lee nis nzha bizh lo yizhyo.
Nu mkiib Noé yek ark paro mlaa xaa laach xaa.
Nu mlaach xaa lee yizhyo mbizhla.
14 Lee mbizh galbgazh xche mbee chop,
mbizhla yizhyo.
15 Zee ngunii Dios lo Noé,
nu nzhé Dios:
16 —Roo leen ark,
lu nu xngwnaa lu nu re xgann lu nu re xix lu.
17 Koo lu rese ma nzho kwaan lu,
re mbyin naro nu mbyin chuut nu re ma nze lo yo,
nu re ma nzelaz lo yo,
zee ya ma dubse lo yizhyo,
zee gal zyen doo xinn ma nu gak ma zyen doo dubse lo yizhyo.
18 Zee mroo Noé nu re xgann xaa,
xngwnaa xaa nu xix xaa.
19 Noka mroo rese ma nze lo yo nu re ma nzelaz lo yo nu re mbyin naro nu mbyin chuut.
20 Nu mdexkwaa Noé lo mdo lo Xaa Tubka Nak nu mzen Noé re ma yon nu re mbyin yon,
mzhib xaa ma lo mdo nu mted xaa ma lo Dios.
21 Nu mzhin re bech yon lo Xaa Tubka Nak nu nyaklextoo xaa.
Nu mle Xaa Tubka Nak xgab,
“Nabaretra na xobde na yizhyo lo re kwaan nle re myet,
nixa re xgab cheen xaa tira nawent nak axta leezha chuut xaa,
naluuxt na yizhyo modxa mluux naya nal.
22 Zee leezha nzho yizhyo;
nzho xaa xeen nu ntoop,
nzho neey nu nzho nal,
nzho bayey nu nzho kwares,
nzho zhe nu nzho yaal.