Dios myaan kwaan Noé
9
Ngunii wen Dios lo Noé nu lo re xgann xaa nu nzhé Dios:
—Bxen gu nu gok zyen gu,
tezhe gu lo yizhyo.
2 Rese ma nzho lo yizhyo zheb ne gu,
rese ma nzebi lo yizhyo nu re ma nzho leen nistoo nu re ma nzelaz lo yo.
Nu la na re ma lo gu.
3 Rese ma mban gak kwaan gaw gu,
noka xle nu re yag naye kwaan mzala na lo gu.
4 Nu nzho tub kwaan nanzhaalt gaw gu,
baal kwaan nzhaal ren,
nel ren nak kwaan mban ma.
5 Nii na lo gu,
nzhaal yet loka ma nu loka xaa gut tub xaa.
6 Chelee tub xaa gut samyet xaa,
lee xaa nzhaal yet,
nel kwenta Dios mdexkwaa Dios xaa.
7 Bxen gu nu gok zyen gu,
tezhe gu lo yizhyo.
8 Nu ngunii Dios lo Noé nu lo re xgann xaa:
9 —Lee nal wii,
yaan na tub kwaan lo gu,
nu lo re dii cheen gu
10 nu rese lo ma kwaan nzho kwaan gu,
ma mroo leen ark,
re ma nzebi,
re ma naro,
re ma nzho lo yizhyo kwaan re gu.
11 Lee kwaan yaan na lo re gu nazhet,
nabaret na luux na re xaa nu re ma kwaan nis.
Nabaret na xaal na nis luux yizhyo.
12 Lee kwaane nak kwaan myaan na tubka kwaan re gu nu re dii cheen gu,
nu kwaan re ma lo yizhyo ne.
13 Lee nal mzo na xpayiit na lo xkaw,
kwaan nle xchinn zee myaan na kwaane lo gu,
xaa nzho lo yizhyo.
14 Gorna xaal na xkaw lo yizhyo ne nu nlu bayiit naz yiba,
15 zee selazh na kwaan myaan na lo gu nu lo re ma nu naxaaltra na nis dox kwaan luux re kwaan.
16 Gorna lee bayiit nke lo xkaw,
zee laach na nu selazh na re kwaan myaan na le na tubka kwaan rese xaa nu re ma mban lo yizhyo.
17 Lee kwaane nak nseyn kwaan myaan na mle na kwaan rese xaa nu rese ma nzho lo yizhyo.
Nu sbaa ngunii Dios lo Noé.
Mzuzh Noé
18 Snee lee re xgann Noé,
xaa mroo leen ark:
Sem,
Cam nu Jafet.
Nu lee Cam ngok xuz Canaán.
19 Re xaa ne ngok yon xgann Noé nu lo re dii cheen xaa ne zee nguzhe yizhyo.
20 Zee mzelo Noé mgoon lo yo nu mxeen xaa yag ub.
21 Nu ngu xaa xisa nu mzuzh xaa.
Nu cheey xaa nzo xaa leen yoo ler cheen xaa.
22 Nu Cam,
xuz Canaán,
mwii cheey xuz xaa,
zee nzhé xaa lo rop wech xaa,
xaa nzo naz jwer.
23 Zee lee Sem nu Jafet mzen ler nu msaaw xaa cho xuz xaa.
Nu kwaan naz tich xaa mze xaa zee msaaw xaa xaa;
nu snee zee namwiit xaa cheey xuz xaa.
24 Nu gorna nguxche Noé lo yalguy zee mzeen xaa kwaan mle xgann xaa,
xaa winra.
25 Nu nzhé xaa:
—Xobde na Canaán,
Lu gak xmos cheen rop xich lu.
26 Noka nzhé xaa:
—Wen doo Xtios Sem,
nu gak Canaán xmos xaa.
27 Nu nii na gro doo nak Xtios Jafet,
nu yo xaa yoo ler cheen Sem;
nu Canaán gak xmos xaa.