Nis dox
7
Ngulo mdexkwaa Noé ark,
zee nzhé Xaa Tubka Nak lo xaa:
—Zeeb lu nu re xaa li lu leen ark,
nel mwii na nali nak lu lo re dii ne.
2 Cheep lu gazh mach nu gazh ma gol,
ma yon;
lee re ma nayont,
cheep lu tuka mach nu tuka ma gol.
3 Nu noka re ma nzebi naz yiba,
gazh mach nu gazh ma gol,
zee ban ma lo yizhyo.
4 Ded stub gazh mbizh zee le na la yey lo yizhyo choo mbizh nu choo yaal.
Nu le nzhul na yizhyo lo re kwaan mban kwaan mdexkwaa na.
5 Nu lee Noé mle re kwaan mer modxa nzhé Xaa Tubka Nak lo xaa.
6 Lee Noé nzho xoop gayoo liin gorna lee yey dox mla lo yizhyo.
7 Nu nel yey dox la,
zee mzeeb Noé leen ark kwaan re xgann xaa nu xngwnaa xaa nu re xix xaa.
8 Re ma yon nu re ma nayont nu re ma nzebi nu noka re ma nzelaz lo yo,
9 chopga lo ma mzeeb kwaan Noé leen ark,
tub mach nu tub ma gol,
modxa ngunabeyy Dios Noé.
10 Nu mbizh gazh mzelo nis dox lo yizhyo.
11 Lee liin kwaan nzho Noé nak xoop gayoo liin kwaan chop mbee nzho chiinmchop mbizh.
Lee mbizh zee mchiil Dios yizhyo,
zee mxaal xaa nis dox lo yizhyo nu mxal yiba mla yey dox.
12 Nu mla yey choo mbizh nu choo yaal.
13 Nu leeka mbizh zee mzeeb Noé kwaan Sem,
Cam nu Jafet,
re xgann Noé nu xngwnaa Noé nu yon xix Noé ngu leen ark.
14 Nu mreep xaa nu rese lo ma wen nu rese lo ma nakap,
rese lo ma nzelaz lo yo nu rese lo ma nzebi nu rese lo mbyin naro nu rese lo mbyin chuut.
15 Nu mreep chopga chopga re ma leen ark kwaan Noé.
16 Nu mreep mach nu ma gol.
Nu rese lo ma mod nzhé Dios lo Noé.
Zee lee Xaa Tubka Nak msaaw roo blii.
17 Zee mzelo yey dox mla lo yizhyo,
dubse tub choo mbizh nu tub choo yaal.
Nu zee lee nis ngok naro,
zee mlepa ark lo yizhyo.
18 Nu lee nis tubka nzeyak naro masra nu lee ark seetaka nzexoob lo nis.
19 Nu lee nis nguxoob lo yizhyo nu msaawa lo re yi kwaan mas naro;
20 nu kan chiin zhit yaa xaa nguxoob nis yek yi kwaan mas naro.
21 Nu lo yizhyo ngut rese ma,
ma wen nu ma nakap nu rese ma nzebi nu rese ma chuut nu rese myet.
22 Rese ma mban,
ma ngoob mbi nu rese kwaan mri lo yizhyo mluxa.
23 Snee mlux rese kwaan mban lo yizhyo lo myet nu lo re ma nakap nu lo re ma wen nu lo re ma nzelaz lo yo nu re ma nzebi naz leen yiba.
Rese kwaan mlux lo yizhyo.
Nu nebse mlake Noé kwaan re xaa kwaan nzho leen ark.
24 Nu lee dubse yizhyo nguzhe nis tub gayoo yirol mbizh.