Duzna kwaan naxinn mle re myet
6
Lee gorna mzelo myet myar lo yizhyo,
zee mkano xaa xchaap xaa.
2 Zee lee re xinn Dios mwii lo re xchaap xaa yizhyo nel chul doo nlu me,
zee mleey xaa re me ngula xaa nu mchelya xaa kwaan lee me.
3 Zee nzhé Xaa Tubka Nak:
“Nazat na diizh ban myet xche doo,
nel baal nak xaa,
kwaanzee ban xaa nebse tub gayoo gal liin”.
4 Nu lee re mbizh zee ngu re xaa naro lo yizhyo.
Nu gorna lee xinn Dios mka re ngwnaa ne,
me nak xinn xaa yizhyo,
zee mkano xaa xaabyi.
Nu re xaa ne ngok xaa mrib xtizh yilo.
5 Zee mwii Xaa Tubka Nak zyen doo kwaan nakap nle re xaa yizhyo,
nle xaa xgab kwaan nle xaa nak nebse kwaan naxinn.
6 Nu lee Xaa Tubka Nak mle xgab:
“¿Chozhiin mdexkwaa na myet lo yizhyo?”
Nu ne ngok lextoo xaa.
7 Nu nzhé Xaa Tubka Nak:
“Nal luux na rese xaa mdexkwaa na nu rese ma,
re ma nakap nu re ma wen nu re ma nzelaz lo yo nu re ma nzebi,
nel ngok nales lextoo na ne na rese kwaan mdexkwaa na”.
8 Per lee Xaa Tubka Nak nguzhal kwaan wen lo Noé.
Dios nzhé lo Noé nen xomod dexkwaa xaa ark
9 Snee nak kwent cheen dii cheen Noé.
Noé ngok tub xaa nali nu wen lo Dios nu mze Noé xnaz Dios.
10 Zee ngol chon xgann Noé,
xaa le Sem,
Cam nu Jafet.
11 Nzho doo kwaan naxinn lo yizhyo nu nzho doo dil.
12 Nu mlaach Dios lo yizhyo,
nzho zyen doo kwaan naxinn lo yizhyo,
nel rese myet kale re kwaan nakap kwaan nzhekla xaa le xaa lo yizhyo ne.
13 Zee nzhé Dios lo Noé:
—Mle wen na xgab luux na rese kwaan nzho dubse yizhyo,
nel nzho zyen doo kwaan naxinn lo yizhyo.
Nu lee nal luux na rese myet nu rese ma kwaan nzho dubse lo yizhyo.
14 Kaxkwaa lu tub ark kwaan yag yech nu kaxkwaa lu lak leena,
zee saaw lu naz leena nu naz ticha kwaan tub kwaan ned kwenta ner,
zee nazeebt nis leena.
15 Nu tub lanee dexkwaa lu ark,
chon gayoo zhit yaa lu le noll lu ark nu choobchii zhit yaa lu le nanyag lu ark nu galbchii zhit yaa lu zeeba naz ya.
16 Nu kaxkwaa luya zee gaka chon pis naz ya.
Nu laa lu tub zhit zeera saaw lu yeka.
Nu noka kanoya tub blii tub ta choya.
17 Nu lee nal,
xaal na tub nis dox lo yizhyo zee luux rese myet nu rese ma kwaan mban lo yizhyo,
rese kwaan nzho yizhyo.
18 Lee nal yaan rop be nu yo lu leen ark:
lu nu re xgann lu nu xngwnaa lu nu xix lu.
19 Nu noka cheep lu tub mach nu tub ma gol lo rese lo ma nzho lo yizhyo,
zee ban ma kwaan lu.
20 Rese lo ma nzebi,
tub loga ma lo rese ma nu rese ma nakap nu rese ma wen,
ma nxen yoo,
tub loga ma lo rese ma.
Nu re ma nzelaz lo yo,
tub loga ma lo re ma.
Chopga ma lo re ma zee zeeb lu kwaan lee ma leen ark,
zee ban re gu ma.
21 Nu toop lu rese lo kwaan gaw ma nu kwaan gaw re gu nu kochaw guya zee kano gu kwaan gaw gu nu re ma.
22 Nu Noé mle mod nzhé Dios lo xaa.