Zephaniah
1
1 Judah kumpipa Amon tapa Josiah in kumpi a sep hun laitakin Hezekiah tapa Amariah tapa Gedaliah tapa Cushi tapa Zephaniah tungah TOPA thu tung a:Siatna Tun ding Vauhilhna
2 "Lei maitang panin
na khempeuh ka phiatmai ding hi,"
TOPA in cikhia hi.
3 "Mihing ganhing ka phiatmai khawm dinga;
huihlak vasate le
tuipi sunga ngasate ka phiatmai ding hi.
Lei maitang panin mite ka khenkhiat ciangin
migilote in van sia lomtang aa bek a nei ding uh hi,"
TOPA in cikhia hi.
Judah Langah
4 "Judah langkhat le Jerusalem a tengte khempeuh tungah
ka khut ka zankhia ding hi.
Hih mun panin Baal them om lai sunte le
lawkite minte le milimte biakna-a siampite-
5 innkhum tungah kah a,
aksi honte bia-a kunte,
TOPA tawh kiciama a kunte le
Molech bb tawh a kiciamte zong,
6 TOPA zuihna panin a kilehheite le
TOPA zong lo-a a kan lote khempeuh ka khenkhia ding hi.
7 TOPA ni nai ta ahi manin
Thupipen TOPA mai-ah daitakin om un.
Biakna pia dingin TOPA kithawi khin hi;
a sapsate siansuah khin hi.
8 TOPA biakna piak ni-in
kumpi uliante,
kumpi tapate le
gamdang puana kizemte
dan ka tuaksak ding hi.
9 Tua ni ciangin kongpi cc pela paikhia khempeuh
ngongtatna le khemna tawh
amau pasiante’ biakinn a dimsakte
dan ka pia ding hi.
10 TOPA in cikhia hi,
"Tua ni ciangin Ngasa Kongpi ah kahna aw ging dinga,
Vengthak panin thumna le mualneute tung panin
a ngaih mahmah kisukna kiza ding hi.
11 No sumbuk venga omte thum un;
na sumbuk khempeuh uh kiphiatmang dd dinga,
ngun ee a sum zong peuhmah kisia ding uh hi.
12 Tua hun ciangin meivak zangin Jerusalem ka zong dinga,
amah bek nuam a sate,
lenggah zu tawdat banga,
"TOPA in a sia a pha
bangmah bawl lo hi,’ a cite dan ka tuaksak ding hi.
13 A hauhna uh kilaksak dinga,
a innte uh a kisiagawp ding hi.
Amaute in inn a lam uh hangin
a sungah teng lo ding uh hi;
lenggui a suan uh hangin
a zu a dawn kei ding uh hi.
TOPA’ Ni Lianpi Ni
14 "TOPA ni lianpi ni nai ta -
nai ta a, manlangin a tung ding hi.
Ngai un! TOPA ni-a kahna,
galhangte kikona nasia mahmah ding hi.
15 Tua ni pen thangpaih ni,
lungdon ni le dah ni,
patauh ni le kisiat ni,
khuamial ni le lungzin ni,
meiipi kai-a khuamial ni,
16 pengkul ni le kulha ki-um khuapite le
a kiu-a tausangte sima
galkapte a ot ni hi ding hi.
17 Mite tungah lungdonna ka tungsak dinga,
amaute mittaw lampai bang ding uh hi,
bang hang hiam cih leh amaute TOPA tungah a mawh zo uh hi.
A sisante uh leivui bangin kisungkhia dinga,
a gilzangte uh nin kihhuai a bang ding hi.
18 TOPA thangpaihna ni ciangin
a ngun a khamte un
amaute a honkhia thei kei ding hi.
Amah in thakhatin
a tawpna tungsak ding ahi manin
ama aamluatna mei in
leitung buppi le leitanga teng khempeuh a kangtum ding hi,"