David phuah.
144
1 Keima Suangpi, TOPA,ka khutte galsimzia sinsaka
ka khutmete galdozia a sinsakpa kiphat ta hen.
2 Amah ka nuai-ah mite aa a nuaisiahpa
hong it ka Pasian le ka kulhpi,
ka mun muanhuai le kei hong hukhiapa hi in,
ka lum le ka bukna ahi hi.
3 TOPA aw, na thudon dingin mihing bang hi-a,
nang ngaihsut dingin mihing tapa bang ahi hiam?
4 Mi in huusan khat tawh kibang a;
a nuntak hun niliim kikhinkhin tawh kibang hi.
5 TOPA aw, na vante khenkham inla hong paisuk in;
mualte lawngin, mei khusak in.
6 Kek kiasak inla galte thehthang in;
na thaltangte kap inla amaute taikeksak in.
7 A sangna pan na khutin hong bansuk inla;
tui thahatte pan le
gamdang mite khut panin
kei hong dalin hong hukhia in,
8 amaute kam zuauthu tawh kidim a,
a khut taklam uh zong zuautat hi.
9 Pasian aw, nang tungah lathak khat kong sak dinga;
khauzang sawm kivawh lyre kong tum ding hi.
10 Nang, kumpite tunga hong gualzosak Pa,
sih theihna namsau panin na nasem David a honkhiapa na hi hi.
11 A kam uh zuauthu tawh a dim,
a khut taklam uh zong
a zuautat, gamdang mite khut pan
kei hong hu-in hong suaktasak in.
12 Tua hileh ka tapate uh a moi lai-un
hoihtaka khang singno bang ding uh a,
ka tanute uh kumpi inn zep nadingin hoihtaka kikhuaka kizem
khuampite bang ding uh hi.
13 Ka saalte uh an namkim tawh
a dim ding hi.
Ka tuute uh a tultul, a tul sawmsawmin
ka lo lai-uah pung ding hi;
14 ka bawngtalte un vangik bb a kai ding hi.
Kulh vanna mun om lo dinga,
sal-a kikai zong om loin,
kongzing ah lungdong a kahna zong a om kei ding hi.
15 Hih bang thu tawh a kituak mite thupha ngah hi-a;
amaute Pasian, TOPA ahi mite thupha ngah ahi hi.