David phuah phatna-la khat.
143
1 TOPA aw, kong thungetna za in,nong lainat ding ngena kong kikona hong za in;
na muanhuaina le na thumaanna in
kei hong suaktasak in.
2 A nungta khat beek na mai-ah a thumaan om lo ahi manin
na nasempa, thukhenna hong thuaksak kei in.
3 Gal in kei hong delh-a,
lei lakah hong sikzan hi;
amah in sawtpi-a site bangin
khuamial lakah hong tengsak hi.
4 Tua ahi ciangin ka sunga ka kha thazawm a;
ka sunga ka lungsim cimawh hi.
5 Tanglai hunte ka phawk a,
na sepsate lungngaingai-in
na khuta na sepsate ka ngaihsunsun hi.
6 Ka khutte nanglam ah kong zakkhia a;
leikeu bangin ka hinna nang duhin a dangtak hi.
7 TOPA aw, hong dawng mengmeng in;
nang hong lunggulhin ka kha a zawm hi;
na maitang hong selsan kei in
nong selsan leh gum sunga kiasukte ka bang ding hi.
8 Nangmah hong muang ka hi manin
zingsang in na itna kip thu kei hong puak hen.
Ka hinna nang tungah hong laamto ka hi manin
ka pai nading lampi hong lak in.
9 TOPA aw, nang sungah kong bu hi,
ka galte pan hong hukhia in.
10 Keima Pasian nang na hi manin
na deihna ka hih ding hong hilh in;
a hoih na Kha in
leitaam tung ah hong pi hen.
11 Na min na khualna-in TOPA aw, ka nuntakna hong hawisak in;
na thumaanna-in lungkhamna pan hong paikhiatpih in.
12 Na itna kip hangin ka galte daisak in;
nangma nasem ka hi manin
ka galte khempeuh susia khin in.