David phuah maskil ca khat. Suanghawm sunga a om hunlai; Thungetna.
142
1 TOPA tungah ngaihtakin ka kiko a;TOPA tungah lainatna ngenin ka aw ka sangsak hi.
2 Ama mai-ah ka lungkimlohna ka sungkhia a;
ama mai-ah ka lungkhamna ka ko hi.
3 Ka sungah ka kha a zawm ciangin
ka lampi a thei nangmah na hi hi.
Ka tot lampi ah mite in
kei thang hong siah sim uh hi.
4 Ka taklam en inla mu in kuamah in
kei hong awlmawh lo uh hi.
Belh nading ka nei kei a;
kuamah in ka nuntakna a thusim kei hi.
5 TOPA aw, nangmah kong sam hi;
"Nangmah ka belh, a nungta gamah
keima tanh na hi hi," ka ci hi.
6 Ka kikona hong ngai in,
kong kisam mahmah hi;
kei adingin hong delhte hat lua uh ahi manin
amaute pan hong hu in.
7 Na min ka phat theih nadingin
thong sung panin hong khahkhia in.
Tua ciangin kei tungah nong hoihna hangin
a thumaante ka kimah hong kikawm ding uh hi.