Tumtheih makaipa ading. David phuah. Phatna-la khat.
140
1 TOPA aw, mi tatsiate pan hong hukhia inlami ngongtatte panin hong dal in;
2 amaute in a lungsimun siatna sawmsim uh a,
nisimin gal kidona a sosak uh hi.
3 Amaute in gulpi aa bangin a leii uh hiamsak uh a;
amaute muk ah mualtan gu a om hi.
4 TOPA aw, migilote khut panin hong kem inla;
kalhelh hong sawm
mi ngongtatte panin hong dal in.
5 Mi kiphasakte in thang hong siah uh a;
amau lenthang khaukualte zakin
ka lampi dungah thang a siah uh hi.
6 TOPA aw, nang tungah, "Ka Pasian na hi hi," kong ci hi.
TOPA aw, nong lainat ding kong ngetna hong za in.
7 Thuneipen TOPA, kei hong hu a thahatpa,
gal kido ni-a ka lutang liahpa aw -
8 migilote deihna pia kei in TOPA aw;
amau ngimnate gualzosak kei in;
tua hi kei leh kiphasak ding uh hi.
9 Kei hong umcihte’ lutangte,
a muk uh gensa lungkhamnate in tuam ta hen.
10 Amaute tungah mei-am lai zu henla;
meikhuk sungah kikhulin
a tho nawn lo dingin buannawi lakah kilawn hen.
11 Gam sungah gensiat hatte kikipsak kei henla;
siatna in mi ngongtatte sabetin beng hen.
12 Mizawngte adingin TOPA thutang a kip lam le
a tasamte thu a letkip lam ka thei hi.
13 Thumaante in na min phat ding uh a,
a thutang mite na mai-ah nungta taktak ding uh hi.