Tumtheih makaipa ading. David phuah. Phatna-la khat.
139
1 TOPA aw, nang kei hong pheklekinnong thei khin hi.
2 Ka heksuk, ka hektohna na thei hi;
a gamlapi panin ka ngaihsutna nong tel hi.
3 Ka pusuahna le ka lupna nong tel a;
ka lampite khempeuh na theihsa ahi hi.
4 Ka leii tungah kammal khat beek a omma-in
teltakin na thei hi, TOPA aw.
5 Ka nung ka ma ah nang, nong huai-a;
ka tungah na khut na nga hi.
6 Tua bang theihna kei adingin lamdang lua a,
sang lua ahi ciangin ka ban zo kei hi.
7 Nangma Kha pan koi ah pai thei ding ka hi hiam?
Nang omna panin koi ah taimang thei ding ka hi hiam?
8 Vante ah kahto leng, tua lai ah na om hi;
a thuknate aa ah ka lupna phah leng tua lai-ah na om hi.
9 Phalvak khate tungah tuangin
tuipi gei gamlapi ah ka teng zongin
10 tua lai nangawn ah na khutin kei hong makaih dinga,
na khut taklam in kei hong lenkip ding hi.
11 "Khuamial in kei hong sel taktak dinga, ka kimkot ah khuavak,
zan khuamial suak ding hi," ka ci zongin
12 nang adingin khuamialpen nangawn a mial kei ding hi;
nang aa in khuamial, khuavak tawh kibang ahi manin
zan in sun bangin khua a vak ding hi.
13 Ahang in, ka hinna sungnungpen dong nangma piansaksa hi-a;
ka nu sul sungah kei nong khuituah khin hi.
14 A lauhuaipi le a lamdangpi in kei hong kibawl ahi manin
nang kong phat hi;
na nasepte lamdang hi, cih teltakin ka thei hi.
15 Munbu sungah kei hong kibawl lai-in,
nang adingin ka guh ka tang kisel lo hi.
Lei thukpi sungah kei hong kigattuah lai-in,
16 pumpi ahi nai lo keimah na mitin nong mu hi.
Kei adingin a kikipsaksa ni khempeuh
khat beek a tun ma-in
na laibu sungah a kigelh khin hi.
17 Pasian aw, nang ngaihsutnate kei tung ab ah manpha si e!
A kigawmna zai mahmah si e!
18 Sim sawm hi leng,
sehnel mal zah sangin tamzaw ding hi.
Ka khanlawh ciangin
nang tawh ka omkhawm lai hi.
19 Pasian aw, migilote thatmai hoh lecin maw!
No, sisan luangsak mite paikhiamang dih un!
20 Amaute in gitloh sawmin nang thu gen uh hi;
na langte in na min zangkhial uh hi.
21 TOPA aw, nang hong mudahte mudahin,
nang langa pangte kih hilo ka hi hiam?
22 Amaute muhdahna sim loh bangmah ka nei kei hi;
amaute ka galte in ka sim hi.
23 Pasian aw, kei hong pheklek inla, ka lungsim thei in;
hong zia-et inla ka lunghimawhnate thei in.
24 Ka sungah langbawlna lampi khatpeuh a om kha hiam cih mu inla,
tawntung lampi ah kei hong kha in.