David phuah.
138
1 TOPA aw, ka lungsim neihzahin nang kong phat ding hi;"pasiante" mai-ah nangma phatna la ka sa ding hi.
2 Nate khempeuh tungah
na min le na thu tawisang khin na hi manin,
nangma itna le na muanhuaina hangin
na biakiin siangtho lam nga-in
kunin na min ka phat ding hi.
3 Kong sap ciangin nong dawng a;
hong hangsansakin, nong lungkhauhsak hi.
4 TOPA aw, leitung kumpite khempeuh in,
na kam pana thute a zak uh ciangin nang hong phat uh hen.
5 TOPA minthanna lian ahi manin
amaute in TOPA lampite la in sa uh hen.
6 A sangpi ah TOPA om taleh a tualniamte thudon-a,
a gamlapi panin a kiphasakte a thei hi.
7 Lungkhamna lakah ka pai hangin
ka nuntakna hong hawisakin;
a heh ka galte langah na khut na zankhia a,
na khut taklamin nong honkhia hi.
8 TOPA in kei adingin a tup a tangtun ding hi;
TOPA aw, nangma itna kip tawntung hi -
na khuta na sepsate nusia kei in.