115
1 Ko tung hi lo, TOPA aw, ko tung hi lo,na itna le na muanhuaina hangin
nangma min kithangsak ta hen.
2 Bang hangin minamte in,
"Amaute Pasian koi ah om hiam?" ci uh ahi hiam?
3 Eite Pasian vantungah om a;
ama lungkim bangbang a sem hi.
4 Ahi hangin amau milimte ngun le kham hi-a,
mihing khuta kibawl ahi hi.
5 Amaute in kam nei napi pau thei lo a,
mit nei napi khua a mu thei kei uh hi;
6 amaute in bil nei napi khua za thei lo a,
nak nei napi anam za thei loin,
7 amaute in khut nei napi zawt thei lo a,
khe nei napi a pai thei kei uh hi;
gawl nei napi aw zong a suaksak thei kei uh hi.
8 Tuate a bawlte amaute tawh kibang dinga,
tuate a muangte khempeuh zong amaute mah tawh a kibang ding uh hi.
9 Israel innkuante aw, TOPA muang un -
amah amaute huhpa le lum ahi hi.
10 Aaron innkuante aw, TOPA muang un -
a mah amaute huhpa le a lum uh ahi hi.
11 No amah a kihtate aw, TOPA muang un -
a mah amaute huhpa le lum ahi hi.
12 TOPA in eite hong phawkin thupha hong pia dinga:
Israel innkuan thupha pia-in,
Aaron innkuan thupha pia dinga,
13 TOPA a kihtate -
aneu alian a kibangin thupha pia ding hi.
14 TOPA in note hong pungsak henla,
note le na tate uh hong khangsak khawm hen.
15 Leitung le vantung a Bawlpa,
TOPA in note thupha hong pia hen.
16 A sangpen vante TOPA aa hi-a,
leitung ahileh mihingte a piaksa ahi hi.
17 TOPA a phatte misite hi loin
daihna muna a paisukte zong ahi kei hi;
18 tu le a tawntunga TOPA
a tawisangte eite i hi hi.
TOPA ba phat un.