Gim ngah mi khat thungetna. Thazawm ciangin TOPA mai-ah a tamlawhna, a sunna.
102
1 TOPA aw ka thungetna hong za in;kong huh ngetna nang kiang hong tung hen.
2 Ka lungdon hunin
na maitang hong selsan kei in.
Na bil kei lam hong ngat inla;
kong sap ciangin manlangin hong dawng in.
3 Ahang in, ka nuntak nite meikhu bangin manga;
ka guhte mei-am kuanglai bangin a sa hi.
4 Ka lungtang maibuakin lopa bangin ka vul a;
ka an nek ding ka mangngilh hi.
5 Ka nak tau luat manin ka kiam a,
guh le vun bek ka hi hi.
6 Sehnel simbu ka banga,
kisiatnate laka simbu om ka bang hi.
7 Ka lupsa-in ka hak gega a,
innkhum dawna vasa tangtuan ka bang hi.
8 Ka galte in sun niloh in hong phin uh a,
kei hong langneihte in ka min hamsiatna-in a zang uh hi.
9 Ahang in, vut an in ka nei a,
ka dawn zong khitui tawh a kihel hi;
10 na thangpaihna a liatluat manin
hong domkangin na pam nong denna hi.
11 Ka nuntak sung nite lah nitaklam niliap bang a;
lopa bangin ka vul ta hi.
12 Ahi hangin TOPA aw, nang kumpi tokhom ah na tu tawntung a;
khang tawntungin hong kitheihna kip den hi.
13 Zion angvan hunta ahi manin hong thoin
amah na khuatuah ding hi;
hun ciangtan zah cingta hi.
14 Ahang in, na nasemte in suangtumte nangawn it uh a,
ama leivuite nangawn a hehpih uh hi.
15 Minamte in TOPA min kihta ding uh a,
leitung kumpite khempeuh in na minthanna a zahtak ding uh hi.
16 Ahang in, TOPA in Zion lam kikin
a minthanna tawh a kilang ding hi.
17 Amah in a hawmsuakte thungetna dawng dinga;
amaute thumna a simmawh kei ding hi.
18 A kipiangsak nai lote in
TOPA a phat theih nadingun
mailama khanglai dingte adingin:
19 " TOPA in a sangna-a a mun siangtho panin ensuk a;
van panin leitung ensuk in,
20 amah in thongkiate tauna za dinga,
si dinga kimawhpaihte a khahkhia ding hi," ci-in kigelh hen.
21 Mite le kumpi-gamte
TOPA bia dingin a kikhop hun ciangin
22 Zion ah TOPA min kipulakin,
Jerusalem ah amah phatna a kigenkhia ding hi.
23 Ka khangtung laitakin ka tha kiasak a;
ka nuntak hun aa a khiam hi.
24 Tua ciangin:
"Ka Pasian aw, ka nuntak kimtanin kei hong lamang kei in;
nang kumte khang tawntungin a kizomsuak ding hi.
25 A tungin leitung bulpi na phut a
vante na khuta na bawlsa ahi hi.
26 Amaute mangthang ding uh a, nang na om den ding hi;
amaute khempeuh puan bangin patkhia ding hi.
Puan silh lai bangin tuate na kheng dinga,
amaute a kinilkhia ding hi.
27 Ahi hangin nang na kibang dena
na nuntak kum bei ngei lo ding hi.
28 Na nasemte’ tate na omna ah teng ding uh a,
amau suante na mai ah a kikipsak ding hi," ka ci hi.