David phuah
103
1 Ka hinna aw, TOPA phat in,ka sungtawng a om khempeuh aw, a min siangtho phat un.
2 Ka hinna aw, TOPA phat inla
ama hanga phattuamna khempeuh mangngilh kei in.
3 Amah in na mawhnate khempeuh maisakin
na natnate khempeuh damsaka,
4 amah in gum panin na nuntakna tankhia-in
itna le khuatuahna hong khusak hi.
5 Na khangnona muvanlai aa a bat kik nadingin
na lunggulhna a hoihte in a taiisak hi.
6 A kinengniam khempeuh tungah
TOPA in thumaan thutangin na a sem hi.
7 Amah in Moses tungah a lampite theisak a,
Israel mite tungah a nasepte theisakin:
8 TOPA in mi khuatuah siamin hehpih siama,
heh baih loin a dimlet itna a nei hi.
9 Amah in eite hong mawhsak den lo dinga,
a hehna hong nga tawntung kei ding hi;
10 amah in i mawhna tawh kituakin hong tuaksak lo dinga,
i gamtat khialhnate tawh kituakin hong thuk kik kei ding hi.
11 Ahang in, leitung panin vante a san bangin
amah a kihtate a itna lian lua a;
12 nisuahna panin nitumna a gamlat bangin
eite panin i tatkhialhnate a hemkhia hi.
13 Pa khat in a tate a khuatuah bangin
TOPA in amah a kihtate a khuatuah hi;
14 ahang in, amah in eite hong kibawlzia thei a,
eite leivui i hilam a phawk hi.
15 Mihing ahileh amah nuntak sung lopa bang lel hi-a,
gamlak pak banga palh ahi hi;
16 huih in mutin mangpah a,
a omna mun kiphawkkha nawn lo hi.
17 Ahi hangin TOPA itna ahileh
amah a kihtate tungah tawntung panin a tawntung dongin kipden a,
ama thumaanna amau tate’ tate tawh a om hi -
18 tua in ama thukhun a zuite tung le
a thusehte man ding a phawk gigete tungah a om hi.
19 TOPA in vantung ah a tokhom kipsak a,
a kumpi-gam in na khempeuh a uk hi.
20 No ama vansawltakte,
ama thu bang a sem a thahat
ama thu a mangte aw TOPA phat un.
21 No ama vantung mihonpite,
ama deih bang a sem nasemte khempeuh aw, TOPA phat un.
22 Ama kumpi-gam sung mun khempeuh-a
ama nasepte khempeuh aw, TOPA phat un.
Ka hinna aw, TOPA phat in.