Phatna 101

David phuah. Phatna-la khat.

1  Na itna le na thutang la-in ka sa ding hi;

TOPA aw, phatna la nang kong sak ding hi.

2  Paubaang lo-a ka nuntak nadingin ka kidawm ding hi -

cik ciangin kei kiangah hong pai ding na hi hiam?

Lungsim paubaang loin

ka inn sungah ka kalsuan ding hi.

3  A sia na khatpeuh

ka mitsuan lo ding hi.

Upna neilote nasepte ka mudah hi;

amaute in kei hong beel kei ding uh hi.

4  A lungsim kawi mi kei tawh kigamla dinga;

gitlohna tawh ka kisawhkha kei ding hi.

5  A vengte a gensia sim peuhmah

ka daisak dinga;

kiphatsak mithah a, lungsim kisatheite

ka thuak kei ding hi.

6  Gam sunga mi muanhuaite tungah ka mit tu dinga,

kei tawh tengkhawm thei ding uh hi;

paubaang lo a kalsuan mi in

ka na a sem ding uh hi.

7  Khemna a zang mi khat beek

ka inn ah teng lo dinga;

zuauphuakte khat beek ka mai-ah

a ding kei ding hi.

8  Gam sunga migilote khempeuh

zingsang simin ka daisak dinga;

gilo-a gamta khempeuh

TOPA’ khuapi panin ka khenkhia ding hi.