94
1 Phu a lapa Pasian, TOPA aw,phu lapa Pasian aw, tangkhia in.
2 Leitung thukhenpa aw, thoto in;
a kisatheite amau tawh kituakin thuk in.
3 TOPA aw, a gilote bang tanvei,
bang tanvei a gilote nuamsa lai ding uh ahi hiam?
4 Amaute in ki-uatsakna kam bungkhiakhia uh a;
a gilo-a gamta khempeuh a kisialsial uh hi.
5 TOPA aw, amaute in na mite suzan uh a;
na gouluahte a nengniam uh hi.
6 Amaute in meigongnute le pemtate golum uh a;
pa nei lote a that uh hi.
7 Amaute in, " TOPA in mu lo hi;
Jacob Pasian in phamawh sa kei," ci uh hi.
8 No, mite laka bangmah phawk lote aw, thusim un;
no mihaite aw, cik ciangin pil ding na hi uh hiam?
9 Bil khua a zasakpa in za lo ding ahi hiam?
mit khua a musakpa in mu lo ding ahi hiam?
10 Minamte a sektatpa in dan tuaksak lo ding ahi hiam?
Mite thu a hilhpa in theih loh nei ding ahi hiam?
11 TOPA in mihing ngaihsutnate thei a;
amaute a mawkna ahilam a thei hi.
12 TOPA aw, na thukham hilhin
na sektat mi thupha ngah hi a;
13 migilote adingin gum a kitawhsak matengin
lungkham huna dingin suahtakna na guan hi.
14 Ahang in, TOPA in ama mite nolh lo dinga;
ama gouluahte a taisan ngei kei ding hi.
15 Thumaanna tungah thukhenna kibulphuh kik dinga,
tuateh a lungsima thutang khempeuh in a zui ding uh hi.
16 Migilote langah kei adingin kua ding ding ahi hiam?
Asia-a gamtate langah kei adingin kua ding ding ahi hiam?
17 TOPA in kei hong huh lo hi leh
dai dide-in sihna sungah ka teng khin tham ding hi.
18 "Ka khe tal ei," ka cih ciangin
TOPA aw, na itna in kei hong lenkip hi.
19 Ka sungah lunghimawhna a tam luat ciangin
nong khamuanna in ka hinna a nuamsak hi.
20 Thukipte pansan a gimna a tun -
a kisiasa kumpi tokhom tawh nang kipawl thei ding na hi hiam?
21 Thumaan langkhat ah amaute kipawlkhawm uh a,
mawhpengte a si dingin a mawhpaih uh hi.
22 Ahi hangin TOPA ka kulhpi hong suak a,
ka Pasian ka belh suangpi hong hi hi.
23 Amah in amau mawhnate bangin thuk kik dinga,
a gitlohna uh hangin a susia ding hi;
eite Pasian, TOPA in amaute a susia ding hi.