Tumtheih makaipa ading. Korah’ Tapate phuah. Phatna-la khat.
85
1 TOPA aw, na gam na angvan a;
Jacob nopsakna a ngei na bangsak hi.
2  Na mite tatkhialhna na maisak a,
amau mawhnate khempeuh na khuhsak hi.
3  Na thangpaihna khempeuh na pampaih a,
na hehluatna na kiheisan hi.
4  Kote Honpa Pasian aw, kote a ngei hong bangsak kik inla
ko tunga na lungkimlohnate beisak in.
5  Kote tungah heh den ding na hi hiam?
A khangkhangte tungah na hehna zomsuak ding na hi hiam?
6  Na mite in nang sung nuam a sak nadingin
kote hong puahpha lo ding na hi hiam?
7 TOPA aw, na itna kip kote hong lakin,
na hotkhiatna kote hong pia in.
8 TOPA Pasian thugen ka ngai ding hi;
amah in ama mite, a misiangte tungah lemna hong kham hi -
ahi hangin amaute haina lamah kihei kei uh hen.
9  A minthanna i gam ah a ten theih nadingin
amah a kihtate, a hotkhiatna in a nai takpi hi.
10  Itna le muanhuaina kituakkhawm uh a,
thumaanna le lemna a kitawp thuk uh hi.
11  Lei panin muanhuaina phulkhia a,
thumaanna in van pan ensuk hi.
12 TOPA in a hoih pia taktak dinga,
i gam in anlak dinga gahsak ding hi.
13  Ama mai-ah thumaanna pai-a
a kalsuan nading lampi a sial kholhsak hi.