Tumtheih makaipa ading. David phuah phatna-la khat.
64
1 Pasian aw, ka phunna kong genkhiat mah bangin hong za in;gal launa panin ka nuntakna hong dal in.
2 Migilote sawmsimna pan,
gamtatsia mihon buaina panin kei hong sel in.
3 Namsau bangin a leii uh hiamsakin
sihtheihna thaltangte bangin a kammal un a ngim hi.
4 Amaute in munbu panin mawhpeng mi kap uh a;
lau het loin thakhatthu-in amah kap uh hi.
5 Amaute khat le khat gitloh sawm ding kihanthawn uh a,
a sima thangsiah ding a kikum uh hi.
Amaute in, "Kua in tuate aa mu ding hiam?" ci uh hi.
6 Amaute in thutang lo ding sawmin,
"Gelna kiciantak khat ngaihsunkha hang ei!" kici uh hi.
Mihing lungsim le ngaihsutna a zuauphuakpi ahi hi.
7 Ahi hangin Pasian in amaute thaltangin kap dinga;
thakhatin a kisatpuk ding hi.
8 Amah in amau leiite amau tung mah tusak dinga,
susia-in, amau a mute khempeuh in
zahpihin a lu uh peisan ding uh hi.
9 Mihing khempeuh lau ding uh a,
amaute in Pasian nasepte tangko in
a sepsate a ngaihsunsun ding uh hi.
10 A thumaante in TOPA sungah lungnuamin
amah bel uh henla;
a lungsima a thutang khempeuh in amah phat uh hen!