David phuah phatna-la khat. Judah Sehnel gama amah a om lai huna.
63
1 Pasian aw, keima Pasian nang na hi a,ka lungsim neihzah in nang kong zong hi;
gam keu le gimna gam tui omlohna munah
ka hinna dangtak a,
nang hong duh in,
ka pumpi in nang hong ngai hi.
2 Mun siangtho sungah nang kong mu khina,
na vangliatna le na minthanna ka en hi.
3 Nuntakna sangin nangma itna hoihzaw ahi manin,
ka mukte in nangmah hong minthangsak ding uh hi.
4 Ka nuntak laiteng nang kong phat dinga,
nangma minin ka khutte ka laamto ding hi.
5 An limpente nek bangin ka hinna a tai ding hi;
ka kam in kipahna muk tawh nang hong phat ding hi.
6 Ka lupna tungah nang kong phawk a;
zan vil sung tawntung nang kong ngaihsunsun hi.
7 Kei hong huh nang na hi manin
na khate’ liim nuai ah la ka sa hi.
8 Ka hinna in nang hong bel a;
na taklam khut in kei hong lenkip hi.
9 Ka nuntakna hong zong amaute kisia ding uh a;
leithuk sungah paisuk ding uh hi.
10 Amaute namsau vat dingin kipia dinga,
se-alte an a suak ding uh hi.
11 Ahi hangin Pasian sungah kumpipa nuam dinga;
Pasian min-a kiciamte khempeuh in amah phatin,
zuauphuakte kam ahileh a kisipsak ding hi.