Tumtheih makaipa ading. Jeduthun ading David phatna-la khat.
62
1  Ka hinna in Pasian tung bek ah khawlna mu a;
keima hotkhiatna ama tung pan ahi hi. 2 Keima suangpi le ka kihotkhiatna amah bek hi a;
keima kulhpi amah ahi hi, hong kiling zo kei ding hi.
3  Mi khat bang tanvei sim lai ding na hi hiam?
Hih kulh awnsa le dai kipuk dek -
note khempeuh in sawnpuk ding na hi uh hiam?
4  Amaute in amau munsang panin
kiatsak ding bek sawm uh a;
zuauphuah nuam a sa uh hi.
A kamun thupha pia napi a lungsimun
a hamsiat uh hi.
5  Ka hinna aw, Pasian bek ah khawlna mu in;
keima lametna amah pan ahi hi.
6  Keima suangpi le ka kihotkhiatna amah bek hi a;
keima kulhpi amah ahi hi; hong kiling zo kei ding hi.
7  Ka hotkhiatna le ka pahtawina Pasiana aa ah om a;
amah ka thahatna suangpi le ka belhna ahi hi.
8  Mite aw, hunte khempeuh ah amah muang un;
Eite belhna Pasian ahi manin
na lungsimte uh ama tungah sung un.
9  A dinmun niam mite husan khat bek hi a,
dinmun sangte lah zuaupi hi lel hi;
tehna-in kiteh leh amaute bangmah hi lo uh a;
amaute husan khat bek hikhawm uh hi.
10  Zawhthawh thu-a suh muang kei unla,
guksa van ah zong kisathei kei un;
na hauhna uh a khang zongin
tuate lungmuanpih kei un.
11  Pasian in na khat gen a, na nih ka za hi:
Pasian aw, tua in nang hatna hi-a,
12  Topa aw, tua in nang itna ahi hi.
Mi peuhmah ama sepsa tawh kizui- in
pahtakman na pia taktak ding hi.