Tumtheih makaipa ading. "Susia kei in" cih aw a sak ding. David phuah. Miktam ca khat. Saul kiang pan suanghawm sunga a taikhiat lai.
57
1 Kei hong lainat in Pasian aw, kei hong lainat in;ka hinna in nang hong bel hi;
vangsiatna a bei mateng na khate liim sung kong beel ding hi.
2 Sang Pen Pasian, kei adingin
ama hoihsak banga a tangtungsak Pasian’ tungah ka kiko hi.
3 Amah in van pan sawlin kei hong honkhia a,
lungso-a kei hong delhte a taihilh hi;
Pasian in ama itna le a muanhuaina hong sawl hi.
4 Humpinelkaite laizangah ka om a;
a hate uh teipite le thalthangte ahi,
a leiite uh namsau hiamte ahi mi -
gamsa gilkialte lakah ka lum hi.
5 Pasian aw, vante tunglam ah kitawisang inla,
leitung khempeuh tungah na min thangsak in.
6 Ka khe lenthang siah uh a -
lungdongin ka boksuk hi.
Amaute in ka lampi ah gum to uh a -
ahi hangin amau mah a sungah kia uh hi.
7 Ka lungkip hi, Pasian aw,
ka lung a kip hi;
la ka sa dinga, ka gingsak ding hi.
8 Ka hinna aw khanglo in!
Harp le lyre aw khanglo dih un!
Phalvak ka phong ding hi.
9 Topa aw, minamte lakah nang kong phat dinga;
mite lakah nang, la kong sak ding hi.
10 Ahang in, na itna lian in vante ban a;
na muanhuaina in huihkhuate a ban hi.
11 Pasian aw, vante tunglam ah kitawisang inla;
leitung khempeuh tungah na min thangsak in.