Tumtheih makaipa ading. Khausai tumtheih-a sak. David phuah maskil da khat.
55
1 Pasian aw, ka thungetna ngai in;kong thumna hong thusim lo kei in;
2 hong za inla hong dawng in.
Ka ngaihsutnate in hong lungkhamsak lua-a,
3 galte aw le migilote hong salh gegana hangin
ka lunghimawh lua hi;
amaute in kei tungah thuakna hong tungsak uh a,
hehsa in hong phuisam uh hi.
4 Ka sungah ka lungsim tawl a,
sihna launa in kei hong busim hi.
5 Launa le linna in kei hong umcih a;
lauluatna in kei hong tuamcip hi.
6 Keimah in, "Vakhu bangin kha nei leng maw!
Lengmangin ka khawl hithiat ding hi -
7 gamlapi ah lengin
sehnel gamah ka om ding hi;
8 pingpei le huihpi tawh kigamlatna,
ka kiliah nading mun manlangin ka zuan ding hi," ka ci hi.
9 Topa aw, khuapi sungah ngongtatna le buaina mu ka hi manin;
migilote tokbuai inla a kampau uh kilamdangsak in.
10 Sun le zanin kulhte tungah vak kawikawi uh a;
tua khua sungah kihuatna le kinawngkaisakna a om hi.
11 Khuapi sungah A susia theite gamtang uh a,
kongzingte ah kivauna le kikhemna tawh a kilawi ngei kei hi.
12 Galte khat in kei hong engko hileh
ka thuakzo dinga;
kei langah hong ensan khat ama thu-in ding hileh
ka buksan thei ding hi.
13 Ahi hangin nang bel keimah bang mi khat,
ka kithuahpih ka lawm hoih mahmah
14 khatvei lai-a kikholhna nuam ka sakpih,
Pasian inn ah mihonte tawh ka tonpih na hi hi.
15 Ka galte lakah siatna in omna ngah ahi manin
theihkholh lohin sihna ab in amaute la henla,
a hingtangun hankhuk ah paisuksak hen.
16 Ken ahileh Pasian ka sam a,
TOPA in kei hong honkhia hi.
17 Nitak, zingsang le sunin
lungdongin ka kikoko a,
amah in ka aw hong za hi.
18 Mi tampi in kei hong langneih zongin,
ka langa galte hong dodenna pan
a liam loin kei hong tankhia hi.
19 Kumpi tokhoma a om denpa Pasian in
amaute za-in thuaksak ding hi -
amaute a lampi uh a khel ngei lo,
Pasian zong a kihta lo mite ahi uh hi.
20 Ka kithuahpih mi in a lawmte sim-a;
ama thukhun a palsat hi.
21 Ama kam thawhbat bangin nal napi
a lungsim ah kigalneihna a om hi;
a thugente sathau sangin nalzaw napi
namsau dawhsa ahi hi.
22 TOPA tungah na lungsim vangik teng suan in,
aman hong puakpih ding hi;
amah in thumaante puksak ngei lo ding hi.
23 Ahi hangin Pasian aw, nang in kisiatna gum sungah
migilote na khia dinga;
sisan suahte le zuauphuak mite
a nuntak hun uh alang na khiam ding hi.
Ahi hangin ke’n ka hileh nangmah kong muang hi.