Tumtheih makaipa ading David phuah maskil fa khat. Saul kiangah Edom-te Doeg pai-in "Abimelech’ inn ah David pai ta hi," a cih lai a.
52
1  Nang thahatpa aw, bang hangin siatna kisaktheihpih na hi hiam?
Pasian mita vangkiampa
bang hangin sunniloh a kisathei na hi hiam?
2  Nang, zuauphuah bek a sipa aw,
na leii in siatna bek sawmsim a,
tempa hiam tawh kibang hi.
3  Nang, apha sangin asia nuam na sazaw a,
thutak gen sangin zuauphuah nuam na sazaw hi.
4  Nang, zuauthei leii aw,
nang, a nasak thei kammal nuamsa ciai!
5  Pasian in siat tawntungna ah nang hong tunsuk taktak dinga,
na puanbuk pan nang hong bawhin hong balzan dinga;
mihingte leitang panin hong bulkalh ding hi.
6  A thumaante in mu in kihta ding uh a;
amaute in amah nuihsanin,
7  "Ama kulh muanhuai Pasian a hisak lo,
ama hauhluatna a muang
midangte siatsakna tawh a khang mipa
tu-in hiah om e!" ci ding uh hi.
8  Ahi hangin kei ka hileh Pasian inn sungah
a khanpha olive kung khat tawh ka kibang a;
Pasian itna kip a tawntungin ka muang den hi.
9  Na sepsate hangin nang kong phat den dinga;
na min hoih ahi manin na min ah ka lamen ding hi;
nangma misiangte muhin nang kong phat ding hi.