Tumtheih makaipi ading. Jeduthun adingin David phuah.
39
1 Keimah in, "Ka gamtatnate ah kidawmina mawh lo dingin ka leii ka kem ding hi;
ka omna ah migilote a om laisiah
ka muk ah muktuam ka thuah ding hi," ka ci hi.
2 Ahi hangin daitaka ka om dide ciang,
a hoih khat nangawn ka gen loh ciangin
ka lunggimna a khang semsem hi.
3 Ka sungah ka lung so a,
ka ngaihsut kawmkawmin meikuang hi;
tua ciang ka leii-in thu ka gen a:
4 " TOPA aw, ka nuntak hun beina le
ka ni phazah hong lak in;
ka nuntakna a beipah ding zia kei hong theisak in.
5 Ka nuntak hun sung zapek cia bekbek na phasak a;
nangma mai-ah ka nuntak kum bangmah tan ahi kei hi.
Mihing khat nuntakna husan khat bek ahi hi.
6 Mihing pen telmunmel om lo-a vaksuk vaktoh ahi hi:
Ama a kibuaisakna a mawkna hi a;
hauhna kholkhol ta leh kuan’n ngah ding cih a thei kei hi.
7 "Ahi hangin Topa aw, tu-in bang zong ka hi hiam?
Ka lametna nang sungah a om hi.
8 Ka tatkhialhna khempeuh panin hong hon inla;
mihaite simmawh hong hisak kei in.
9 Ka dai dide hi; nang sem khin na hi manin
ka kam ka kek kei ding hi.
10 Na satna khauteep kei tung panin lakhia ta in;
na khuttum a nong tupna in kong hong zothawh hi.
11 Mite amau mawhna hangin taihilhin na sektat a;
ngetpi bangin amau hauhna na gaitum a -
mihing pen husan khat bek ahi hi.
12 " TOPA aw, kong thungetna hong za inla
nong huh dinga kong kikona hong ngai in;
ka kahna hong bengngonsan kei in.
Ahang in, ka pate khempeuh bangin pemta le
mikhualin nang tawh ka tengkhawm hi.
13 Kei hong kimuhmawhbawl in, kei paikhia-a ka om nawnloh ma-in
ka lungnop kik theih nadingin kei hong hawi in," ka ci hi.