Tumtheih makaipa ading. David phuah. phatna-la khat.
40
1 Lungduaitakin TOPA ka ngak a;kei lam hong nga-in ka kikona a za hi.
2 Amah in buanciim omna gum,
buannawi le kawt lak panin kei hong phong to a;
suangpi tungah ka khe koih in
munkip ah kei hong dingsak hi.
3 Ka kam ah lathak khat hong guan a,
eite’ Pasian phatna biakna-la khat ahi hi.
Tampi in mu in lau ding uh a
TOPA a muang ding uh hi.
4 Ama muanna TOPA hisak a,
mi kiphasakte en loin
pasian-manlote aa a nungngatsan
mi thupha ngah ahi hi.
5 Keima Pasian TOPA aw,
na bawlsa nalamdang tampi om hi.
Ko adingin na geelsa nate,
kuamah in simkik zo lo a;
tuate gen ding sut dingin sawm ta leng
genkhiat zawh lohin tam lua mahmah hi.
6 Biakna le piakna na lunggulh kei a,
ahi hangin ka bilte na vutlet khin hi; bb, cc
meihal biakna le mawhna hanga biakna
na kal kei hi.
7 Tuateh, "Kong paikhin a, hiah ka om hi -
ka thu laizial sungah a kigelh khin hi. dd
8 Nangma deihna ka sem nuam hi, ka Pasian aw;
nangma thukham ka lung sungah a om hi," ka ci hi.
9 Mihon tampi lakah thumaanna ka tangko a;
nang theih bangin ka mukte ka khakcip kei hi,
TOPA aw.
10 Na thumaanna ka lungsim ah selcip loin,
na muanhuaina le na hotkhiatna ka genkhia hi.
Kikhawm mi tampi tungah
na itna le na thutak ka imcip kei hi.
11 TOPA aw, nangma lainatna kei tungah khakcip kei inla
na itna le na thutak in kei hong dal tawntung hen.
12 Ahang in sim zawh loh lungkhamna in kei hong umcih in;
ka mawhnate in kei hong phadong a, khua ka mu thei kei hi.
Tuate ka luzanga ka samzang sangin tamzaw a,
ka sungah ka lunglel hi.
13 Kei nong hotkhiat ding lungkim in, TOPA aw;
TOPA aw, kei hong huh dingin hong pai meng in.
14 Ka nuntakna hong laksak nuamte khempeuh
maizumin buaigawp uh hen;
kei siat ding a deih khempeuh
maimawlsa in lehkik uh hen.
15 Kei tungah, "Awi bek si’ng, awi bek si’ng" a cite in
amau maizumna mah mulkimpih uh hen.
16 Ahi hangin nang hong zongte
nang sungah nuamsa-in kipak uh henla;
na hotkhiatna a itte khempeuh in,
"TOPA kitawisang hen!" ci den uh hen.
17 Tua hinapi zawngin ka tasam hi;
Topa in hong phawk hen.
Kei hong huh a hong hukhiapa nang na hi hi;
hong ziakai kei in, ka Pasian aw.