David phatna-la khat. Ngetna khat
38
1 TOPA aw, hehsa in hong taihilh kei inla;thangpaisa in hong sek kei in.
2 Ahang in, na thaltangte in kei hong sunlet khin-a,
kei tungah na khut hong tusuk zo hi.
3 Nang thangpaihna hangin ka pumpi dam thei lo a;
ka mawhna hangin ka guhte a khauh kei hi.
4 Vangik lua mahmah puak bangin
ka khialhna in kei hong vukcip hi.
5 Ka hai mawhna hangin
ka liamnate muatin a kihhuai hi.
6 Hong kiniamkhiat mahmah a
sunnilohin kun kheukheu-in thumthumsa-in ka vak hi.
7 Ka nung suk teng na mahmah a;
ka pumpi tungah a damna mun a om kei hi.
8 Ka tha nem-in hong kinengcip a;
lunggim lua-in ka tau hi.
9 Ka lunggulhna khempeuh na mai-ah
kong luikhia hi, Topa aw;
ka khuisatna nang kiang pan a kisel kei hi.
10 Ka dip kuakua a, ka thahatna bei ta hi;
ka mit nangawn mial ta hi.
11 Keima liammate hangin
ka lawmte le ka kikholhpihte in hong pel uh a;
ka vengte in gamlapi ah hong omsan uh hi.
12 Ka nuntakna a zongte in a thangte uh siah uh a,
kei hong nasak nuamte in ka siat nading a kikum uh hi;
sun nilohin khem hong sawm uh hi.
13 Bangmah a za thei lo bilngongpa ka bang a,
a kamka thei lo awktawngpa ka bang hi.
14 Khua a za lo, a kam in a dawngkik thei lo pa
ka bang khin hi.
15 TOPA aw, nangmah kong ngak hi;
Topa ka Pasian aw, nong dawng ding hi.
16 Ahang in, keimah in, "Ka khe a tal ciangin
kei tungah kihisakin kisangsak kei uh hen," ka ci hi.
17 Ahang in kei ka puk dekdek a,
ka natna a kam thei kei hi.
18 Ka khialhna ka pulak a;
ka mawhna in hong lungkhamsak hi.
19 A thahat ka galte tampi hi uh a,
a thu om lopi-a hong mudah tampitak ahi uh hi.
20 Ka hoihna gitlohna-a hong thukte in,
a hoih ka zon ciangin hong gensia uh hi.
21 TOPA aw, kei hong taisan kei in;
hong gamla omsan kei in ka Pasian aw.
22 Keima Honpa Topa aw,
kei huh dingin hong kuan meng in,