David phuah.
37
1 Misiate hangin lunghimawh kei inla,amaan lo-a gamtate eng kei in;
2 ahang in, amaute lopa bangin vul pak ding uh a,
singno hing bangin amaute si baih ding uh hi.
3 TOPA muangin na hoih sem in;
gam sungah tengin a muanhuai lonona nuamsa in.
4 Nangmah in TOPA sung nuamsa lecin
na lungsima na lunggulhte hong pia ding hi.
5 TOPA tungah na vai ap-in;
amah muang in, ama’n a sem ding hi.
6 Amah in na thumaanna zingsang khuavak bangin tangsak dinga,
na thutangna sun nitang bangsak ding hi.
7 TOPA mai-ah om hithiat inla
lungduaitakin amah ngak in;
mihingte amau lampite ah a lawhcin uh ciang leh
gitloh a sawmnate uh a hih zawh uh ciangin lunghimawh kei in.
8 Hehna ki-ip inla thangpaihna kiheisan in;
lunghimawh kei in - tua in gitlohna tun lel hi.
9 Ahang in, misiate kipuakoih dinga,
ahi hangin TOPA ah lametna neite in gam a luah ding uh hi.
10 Migilote tomkha sungin om nawn lo dinga;
amaute na zon hangin kimu lo ding hi.
11 Ahi hangin lungnemte in gam luah ding uh a
lungmuanna lianpi nuam a sa ding uh hi.
12 Migilote in thumaante langpan sawm uh a,
amaute hagawisan uh hi;
13 ahi hangin Topa in migilote ni a tun ding thei ahi manin
amaute nuihsan hi.
14 Migilote in mizawngte le a tasamte nuainet ding,
a gamtatna-a thutangte that dingin
namsau dokin thal a kek uh hi.
15 Ahi hangin a namsaute un amau lungtang mah dawtlet dinga,
a thalte uh a kisutan ding hi.
16 Migilo tampite hauhna sangin,
a thumaante in tawmkha a neih uh hoihzaw hi;
17 ahang in, migilote vangliatna kisutan dinga,
thumaante ahileh TOPA in a lenkip ding hi.
18 A kawkbaang lote’ nite TOPA in thei a,
amau gouluah a kip den ding hi.
19 Tuahsiat hunin amaute dual lo ding uh a,
kialpi hunin tampi nei-in nuam a sa ding uh hi.
20 Ahi hangin migilote kisia dinga;
TOPA galte gamlak mel hoihte bangin
mangthang ding uh a -
meikhu bangin a mangthang ding uh hi.
21 Migilote in leitawi-in din kik lo uh a,
ahi hangin a thumaante in cingh takin a pia uh hi;
22 tua bang TOPA thupha piakte in gam a luah ding uh hi;
ahi hangin a hiamsiatte a kihemkhia ding hi.
23 TOPA in mi khat lampi a lungdampih leh
a kalsuannate kipsak hi;
24 a kimuktu kha zongin
TOPA in a khutin lenkip ahi manin a puk kei ding hi.
25 Naupang ka hi ngei a tu-in ka tekta hi;
tua sungin thumaante a kinusia ahi a,
a tate khutdawh ngena vak ahi zongin
ka mu ngei kei hi.
26 Amaute a tawntungin cingh uh a, baihtakin a leitawi uh hi;
amaute tate thupha a kipia ding hi.
27 Siatna kiheisan inla na hoih sem in;
tua hileh gam sungah na teng tawntung ding hi.
28 Ahang in, TOPA in thutangte it a,
ama muan te a taisan ngei kei ding hi.
Amaute kihu tawntung dinga,
migilote suante ahileh a kihemkhia ding hi;
29 a thumaante in gam luahin
a teng tawntung ding uh hi.
30 A thumaante kam in pilna paukhia a,
ama leii in thutang a gen hi.
31 Ama Pasian’ thukham a lungsim ah om a;
a khete a tal kei hi.
32 A thumaante bukin migilote boka,
amaute nuntakna mahmah a zong uh hi.
33 Ahi hangin TOPA in amaute vangliatna sungah, a thumaante nusia lo dinga,
thukhenna ah a kimawhpaihsak kei ding hi.
34 TOPA ngak inla ama lampi tawn in,
amah in gam luah dingin nang hong tawisang dinga,
migilote a hepkhiat ciangin na mu ding hi.
35 Leihoihna-a po singkung hing tawh a kibang
a khanpha mi gilo a tatsia khat ka mu hi;
36 ahi hangin mangpah-a a om nawn kei hi;
amah zong ta lehang a kimu thei nawn kei hi.
37 A genbaang lote ngaihsunin a thutangte lungngai dih in;
lemna a deih mipa adingin mailam hun aa a om lai hi.
38 Ahi hangin mawhneite khempeuh kisusia dinga;
migilote mailam hun bb kikhaktan ding hi.
39 A thumaante’ hotkhiatna TOPA kiang pan hong pai-a,
amaute lungkham hunin amah a kulhpi uh ahi hi.
40 TOPA in amaute huhin hukhia a;
amaute in amah bel uh ahi manin
migilote panin amaute hu-in a honkhia hi.