33
1 No a thumaante aw, lungnuamtakin TOPA la sak un;amah a thutangte phat dingin kilawm hi.
2 Harp-in TOPA phat unla;
khauzang sawm kivawh lyre amah tum un.
3 Amah lathak sak unla;
kilawmtakin tum unla nuamin kiko un.
4 Ahang in, TOPA kammal maanin thumaan a;
a hihna khempeuh ah muanhuai hi.
5 TOPA in thumaanna le thutang it a;
ama itna kip leitung dim hi.
6 TOPA thu-in vante kibawl-a -
amau aksi honpite ama huusan tawh kibawl ahi hi.
7 Amah in beelte aa sungah tuipi tuite khawm a;
vankholna innte ah tui thukpi a koih hi.
8 Leitung khempeuh in TOPA kihta henla;
leitung bup a mi khempeuh in amah zahtak uh hen.
9 Ahang in, amah pau-a a cih bangin piang hi;
amah in thu pia-a dingkip hi.
10 TOPA in minamte’ ngimnate guaksuaksak a,
mite sawmnate a dal hi.
11 Ahi hangin TOPA geelnate kipden a,
a lungsima a ngimnate akhang a khangin kip tawntung hi.
12 Amaute Pasian TOPA hi-a
a gouluah dinga a teel mite, thupha ngah minam ahi hi.
13 Van panin TOPA in ensuk a,
mihing khempeuh a mu hi;
14 ama tenna - mun panin
leitunga teng khempeuh a vil gige hi -
15 amah in mi khempeuh lungsim bawl a,
amaute sepna khempeuh a entel hi.
16 A galkap hauh thu-a kihonkhia kumpi om lo a;
ama thahat thu-a suakta galhang a om kei hi.
17 Kihut nadingin sakol muan, a mawknapi hi-a;
a hat mahmah hangin a honkhia zo tuan kei hi.
18 Ahi hangin TOPA mit in amah a kihtate,
ama itna kip a lamente mitsuan a,
19 sihna pan amaute hukhia in kialpi hun ciangin
amaute kema a nungta uh hi.
20 TOPA lamenin i ngak hi;
amah eite huhpa le i lum ahi hi.
21 Ama min siangtho muang i hi manin
ama sungah i kipak hi.
22 TOPA aw, nang sungah lametna kong neih mah bangun
na itna kip ko tungah hong khawlsak in.