David phuah. Amah a hawlkhia Abimelech mai-ah mihai a kineih a a paisan hun lai.
34
1 Hun khempeuh ah TOPA ka tawisang dinga;amah phatna ka mukte tawh a kitalawi kei ding hi.
2 Ka hinna TOPA sungah kisathei ding hi;
gim thuakte in za uh henla kipak uh hen.
3 Kei tawh TOPA’ min thangsak khawm un;
ama min tawisang khawm ni.
4 TOPA ka zonga aman kei hong dawngin;
ka launa khempeuh panin hong hukhia hi.
5 Amah mitsuante maitaang uh a;
amau maitangte zumna in a khuh ngei kei hi.
6 Hih mizawngpa in sam a, TOPA in a za hi;
ama lungkhamna khempeuh panin a honkhia hi.
7 TOPA a kihtate kimkot ah vansawltak in giahphual sat-a,
amaute hukhia hi.
8 TOPA hoih hi, ciam unla mu dih un;
amah beel mi thupha ngah ahi hi.
9 Amah kihtate bangmah kisam lo ahi manin
no ama misiangte aw, TOPA kihta un.
10 Humpinelkaite thanemin gilkial thei uh hi;
ahi hangin TOPA a zongte na hoih bangmah a tasam kei uh hi.
11 Ka tate aw, hong pai-in ka thu ngai un;
TOPA kihtakzia note kong hilh ding hi.
12 A nuntakna it a
ni hoih tampi a mu nuam peuhmah in,
13 gitlohna panin na leii uh kem unla,
zuau genna panin na muk uh kem un.
14 Gitlohna kiheisan unla na hoih sem un;
kilemna zong unla delh un.
15 TOPA’ mitte, a thumaante tung tu-a,
ama bilte in a kikona uh ngai gige hi;
16 siatna bawlte, amaute kiciamtehna leitang pan a phiatkhia dingin
TOPA in maingatin a sal gige hi.
17 A thumaante kiko peuh leh TOPA in za a;
amau lungkhamna khempeuh panin amah in hukhia hi.
18 Lungtang kitamkhamte kiangah TOPA nai a,
a lungsim kitamzante honkhia hi.
19 A thumaan mi in lungkhamna tampi nei thei hi,
ahi hangin TOPA in tuate khempeuh panin a hukhia hi;
20 ama guhte khempeuh hutsak a,
tuate khat beek a kitan kei ding hi.
21 Siatna in migilote that dinga;
a thumaan mi’ galte a kimawhpaih ding hi.
22 TOPA in ama nasemte tankhia a;
amah a beelte khat beek a kimawhpaih kei ding hi.