David phuah. Maskil ca khat.
32
1 A tatkhialhnate kimaisak a,a mawhna a kikhuhsak mi
thupha ngah ahi hi.
2 TOPA in ama mawhna a khuksak loh mi,
a lungsim ah khemna a paii lo mi,
thupha ngah ahi hi.
3 Sun thapai-a ka maumauna hangin
ka daih dide ciangin,
ka guhte a teemgawp hi.
4 Sun le zanin ka tungah
na khut gik ahi manin;
khuakhal nisa bangin
ka hatna a hupkang hi.
5 Tua ciangin ka mawhna nang kong theisak a,
ka khialhna ka im kei hi.
"Kei tatkhialhnate TOPA tungah
kong pulak ding hi," ka ci-a -
tuateh nang ka khialhna hanga
mawhsakna nong maisak hi.
6 Tua ahi manin a pasian-mi peuhmah in muh theih a na om sungin nang tungah
thu hong ngen ta uh hen;
tua hileh tuihat a khan ciangin
amaute a bankha peuhmah kei ding hi.
7 Ka bukna mun nang na hi hi;
lungkhamna pan hong dal inla
hutkhiatna late in nong umcih ding hi.
8 Na pai nading lampi hong lak-in kong hilh ding hi;
thu hong hilhin kong cing ding hi.
9 Theihtelna a nei lo sakol peuh
laa peuh tawh kibang kei in,
tua bangte satna le kamkaih tawh uk kul ding hi;
tua hi kei leh nang kiangah hong pai kei ding uh hi.
10 Migilote’ gimna tampi hi-a,
TOPA a muang mite ahileh
ama itna kip in a umcih hi.
11 No a thumaante lungnuamin TOPA sungah kipak un;
no lungsima thutangte khempeuh aw, la sa un!