David phuah
28
1 Keima Suangpi TOPA aw, nang kong sam hi;keilam ah na bil ngongsak kei in.
Ahang in dai dide in na om leh
gum sunga kiasuksate ka bang ding hi.
2 Na Mun Siangtho Pen lamah
ka khutte lamto-in,
nong huh ding kong nget bangin
hong lainatin kong kikona hong za in.
3 Migilote le a gitloh gamtatte,
a vengte kamnemin hopih napi
amau lungsim ah huatna a kholte tawh
hong kaikhia khawm kei in.
4 Amaute gamtatnasate le
a gamtatsiate uh thuk kik in;
a khutun a sepnate uh thuk inla
amaute tawh kituakin amau tungah tusak in.
5 Amaute in TOPA nasepte a khuta
a sepsate a thusim loh nungsangun
amaute phelkhia dinga,
a lam kik ngei nawn kei ding hi.
6 Hong lainat ding ngenin ka kikona hong za khin ahi manin
TOPA kiphat ta hen.
7 TOPA in ka hatna le ka lum ahi hi;
ka lungsim in amah muanga, keimah hong kihuh hi.
Ka lungsim nuamin dianga,
la sakin ama tungah lungdam ka ko ding hi.
8 TOPA in ama mite’ thahatna hi-a,
ama sathau-nilhpa adingin hotkhiatna kulhpi ahi hi.
9 Nangma mite hon inla na gouluahte thupha pia in;
amaute tuucin-a cingpa hi inla, tonpih tawntung in.