David phuah
27
1 TOPA in ka khuavak le ka hotkhiatna ahi hi -kua lau ding ka hi hiam?
TOPA ka nuntakna kulh muanhuai ahi hi -
kua lau ding ka hi hiam?
2 Ka sa aa nawmvalh dingin
migilote hong kuan uh ciang,
ka galte le ka langte in kei hong sim uh ciangin,
amaute kimuktu in a puk ding uh hi.
3 Galkap honin kei hong umcih zongin
ka lunglau kei ding hi;
ka langah gal in hong do zongin tua ciang nangawnin
ka kimuang lai ding hi.
4 TOPA thu khat ka donga
ka zon hih ahi hi:
ka nuntak sung tawntung
TOPA inn sungah ka ten theih nading,
TOPA mel hoihna enin
ama biakinnpi ah amah ka zon theih nading ahi hi.
5 Ahang in, lungkham hunin
ama tenna sungah lungmuangin kei hong kemin,
a biakbuk liim sungah kei hong seel dinga,
suangpi khat tungah kei hong koih to ding hi.
6 Tua ciangin hong umcih galte tungsan ah
ka lu kitawisangin
lungdamna aw tawh kiko-in a biakbuk ah biakna ka pia dinga;
la sakin TOPA tungah tumtheih ka tum ding hi.
7 Kong sap ciangin ka aw za in, TOPA aw;
kei hong lainat inla hong dawng in.
8 Ka lungtang in, "Ama bb mai zong sin!" hong ci hi.
TOPA, na maitang kong zong ding hi.
9 Na maitang hong seelsan kei inla
na nasempa hehsa-in hong nawhkhia kei in;
kei hong huhpa nang na hi hi.
Hong nolh kei inla zong hong taisan kei in,
ka Honpa Pasian aw.
10 Ka nu le ka pa in hong taisan uh zongin,
TOPA in kei hong sang ding hi.
11 TOPA aw, na zia hong hilh inla;
kei hong nuainette hangin
lampi tang ah kei hong pi in.
12 Ka galte deihna ah kei hong puak kei in;
teci zuaute kei langah pang uh a,
ngongtatna huu a sangkhia uh hi.
13 Hih thu ah ka kimuang lailai hi:
A nungtate gamah
TOPA hoihna ka mu ding hi.
14 TOPA ngak in;
kihatsakin kilungkhauhsak inla
TOPA ngak in.