Phatna 5

Tumtheih makaipa ading. Tamngaite a tum. David phatna-la khat.

1 TOPA aw, ka thute na bil hong ngat-in

ka khuisatnate hong thudon in.

2  Ka Kumpi le ka Pasian aw,

nang tungah huh ding hong ngen ka hi manin,

kong kikona hong ngai in.

3 TOPA aw, zingsang in ka aw na za hi;

zingsangin na mai-ah ngetnate kong tun a,

lamentakin ka ngak hi.

4  Nang, thu sia ah nuam a sa Pasian na hi kei a,

nang tawh migilote a tengkhawm thei kei hi.

5  Nang omna ah a ki-uangsakte ding thei lo a,

khialhna a bawl khempeuh na mudah hi.

6  Zuauthu gente na susia a;

sisan suahte le mi khem theite

TOPA in kih hi.

7  Ahi hangin nangma lainatna lianpi hangin kei,

na inn sungah kong lut dinga,

zahtakna tawh na biakinn siangtho lamah

kong kunsuk ding hi.

8 TOPA aw, ka galte hangin

nangma thumaanna ah hong pi in -

ka mai-ah nangma lampi tangsak in.

9  Amaute kam pana kammal khat beek muantak lo a,

a lungsim uh kisiatna tawh dim hi.

Amaute gawl, han kihongsa hi a;

a leii-un zuauthu a gen uh hi.

10  Pasian aw, amaute mawh khusak in!

Amaute sawmsimnate amau pukna suaksak in.

Amaute in nang hong lehdo uh ahi manin

amaute mawhna tampite hangin amaute hawlmang in.

11  Ahi hangin nang hong beelte khempeuh lungdamin

amaute in lungnuamin la sasa uh hen.

Na min a itte nang sungah a kipak nadingun

amaute tungah na liahna zal in.

12 TOPA aw, a thumaante thupha na pia takpi a,

na angvanna tawh amaute lum bangin na sung hi.