Judah Kumpi Amaziah
14
1 Israel kumpipa Jehoahaz tapa Jehoash aa a kum nihna kumin Judah kumpi Joash tapa Amaziah in uk ding a kipan hi. 2 Amah kumpi a suahin kum sawmnih le nga pha a, Jerusalem ah kum sawmnih le kua sung a uk hi. A nu min Jehoaddin hi a; amah Jerusalem pan ahi hi. 3 Amah TOPA mit ah amaanin gamta napi a pa David aa zah ahi kei hi. Na khempeuh ah a pa Joash lamlah bangin a zui hi. 4 Ahi zongin munsangte kikhinkhia tuan lo hi; mite in tua lai-ah biaknate pia-in gimnamtui a hal veve uh hi.5 Amah in kumpigam kiptakin a letkip khit ciangin, a pa kumpipa a that uliante a that hi. 6 Tua hi napi Moses Thukham Laibu sunga TOPA thupiakna: "Amau tate hangin pate kithat lo dinga, amau pate hangin tate a kithat kei ding hi, mikim, ama mawhna hangin si ding hi." bb ci-a kigelh tawh kizui-in misuamte tapate a that kei hi.
7 Amah Ci Kuam a om Edom-te tulsawm a zopa hi-a, Sela simin zo a, Joktheel min a phuak hi; tuni dongin tua mah minin a nei lai hi.
8 Tua ciangin Amaziah in Israel kumpipa, Jehu tapa, Jehoahaz tapa, Jehoash kiangah kamtai sawla, "Hong kuan un, kimaituah mah ni," ci-in a tosak hi.
9 Ahi hangin Israel kumpipa Jehoash in Judah kumpipa Amaziah kiangah, "Lebanon a thangling kung khat in Lebanon a tamtak kung khat kiangah, "Ka tapa zi dingin na tanu hong pia in," ci-in thu a khak hi. Tua ciangin Lebanon a gamsa khat pai-in thangling kung a khe nuai-ah a tuangawp hi. 10 Edom na zo takpi-a tu-in na kiphasak hi. Na gualzawhna thangsak lel inla inn ah om hithiat in! Bang hangin lungkham nading zonga, nang le Judah zong a kiat nading zong na hi hiam?" ci-in a thuk hi.
11 Ahi zongin Amaziah in mang nuam lo a, tua hangin Israel kumpipa Jehoash in a sim hi. Judah a Beth Shemesh ah amah le Judah kumpipa Amaziah khat le khat a kimaituah uh hi. 12 Israel in Judah zo a, mi khempeuh amau inn ciatah a taikek uh hi. 13 Israel kumpipa Jehoash in Beth Shemesh ah Ahaziah tapa, Joash tapa Judah kumpipa Amaziah a zo hi. Tua ciangin Jerusalem ah Jehoash pai-a, pi zaguk bang a sau cc - Jerusalem kulh Ephraim Kongpi panin Kiukawi Kongpi dong a susia hi. 14 Amah in ngun le kham khempeuh le TOPA biakinnpi sung le kumpi-inn sunga sumkholnate sunga a kimu vanzatte khempeuh a la hi. Amah in luangkhamna mite zong tonpih a Samaria ah a ciah hi.
15 Jehoash uk sunga thupiang a dangte, le ama sepsa le a matutsate le Judah Kumpipa Amaziah tawh a kidonate a kipan Israel kumpite khangthu kigelhna laibu sungah kigelh khawm lo ding ahi hiam? 16 Jehoash a pate tawh tawlnga khawm a, Israel kumpite tawh Samaria ah kivui khawm hi. Tuateh a tapa Jeroboam in a za luah a kumpi a suak hi.
17 Israel kumpipa Jehoahaz tapa Jehoash a sih nung kum sawm le nga sung Judah kumpipa Joash tapa Amaziah a nungta lai hi. 18 Amaziah uk sunga thupiang dangte Judah kumpite khangthu ciamtehna laibu sungah kigelh hi lo ahi hiam?
19 Amaute in Jerusalem ah amah sawmsim uh a, amah Lachish ah a tai hi; ahi hangin amaute in Lachish ah mi nungdelhsak uh a tua lai-ah a that uh hi. 20 Amah sakol-in pua kik uh a, David Khuapi Jerusalem ah a pate tawh a kivuikhawm hi.
21 Tua ciangin Judah mi khempeuh in kum sawm le guk a pha Azariah, ad a pa Amaziah munah kumpi in a koih uh hi. 22 Amaziah a pate tawh a tawlngak khitin amah in Elath lam kika, Judah gam a suaksak kik hi.
Israel Kumpi Jeroboam II
23 Judah kumpipa Joash tapa Amaziah uk a kum sawm le nga kumin Israel kumpipa Jehoash tapa Jeroboam, Samaria ah kumpi suak a, kum sawmli le khat sung a uk hi. 24 Amah TOPA mit ah a sia-in gamta a, Nebat tapa Jeroboam in mawhna bawla Israel zong a bawlsakte panin a kiheisan kei hi. 25 Gath Hepher pana kamsangpa Amittai tapa ama nasempa Jonah tungah TOPA Israel Pasian genna tawh kizui-in Israel gamgite Lebo be Hamath panin Arabah cf Tuipi dong a ngei a bangsakpa amah ahi hi.
26 Israel sunga om sila, sila lo, mikim in a thuak uh a sah luat lam TOPA in mu khina, amaute huh ding kuamah a om kei hi. 27 Tua hi-a TOPA in vantung nuai panin Israel min phiatkhiat ding a gen loh nungsang-in, amah in Jehoash tapa Jeroboam khutin amaute a honkhia hi.
28 Jeroboam uk hun sungin thupiang dangte le ama sepsa khempeuh le galsima amatutsate khempeuh Yaudi-te dg neihsa Damascus le Hamath, Israel adingin a ngah kikna-a kipan, Israel kumpite khangthu ciamtehna laibu sungah kigelh khin hi lo ahi hiam? 29 Israel kumpite ahi a pate tawh Jeroboam a tawlnga khawm hi. Tuateh a tapa Zechariah in a za luaha kumpi a suak hi.