Israel Kumpi Jehoahaz
13
1 Judah kumpipa Ahaziah tapa Joash a kum sawm nih le thumna kumin Jehu tapa Jehoahaz Samaria ah Israel kumpi suak-a, kum sawm le sagih sung a uk hi. 2 Amah in Nebat tapa Jeroboam in mawhna bawla Israel zong a bawlsakte hangin TOPA mitah a sia-in gamta-a tuate a kiheisan kei hi. 3 Tua ciangin Israel tungah TOPA hehna kuanga Aram kumpipa Hazael le a tapa Ben-Hadad khut nuai-ah sawtveipi a omsak hi.4 Tua ciangin Jehoahaz in TOPA maipha zong a, Aram kumpipa in Israel a nuainet luat lam TOPA in mu ahi manin ama thu a ngai hi. 5 TOPA in Israel a hukhia ding puaka Aram vangliatna panin a suakta hi. Tua ciangin Israel-te a ma-a a om ngei bangun amau inn ah a om uh hi. 6 Ahi hangin Israel mawhna a bawlsak Jeroboam innkuante mawhnate panin amaute kihei tuan lo uh a; tuate bawlsuak uh hi. Asherah khuam ca zong Samaria ah po lai hi.
7 Aram kumpipa in Jehoahaz galkapte susia khina, ancil huna leivui bangsak ahi manin sakol-tuang sawmnga, sakolleng sawm le khe galkap tulsawm longal bangmah a om nawn kei hi.
8 Jehoahaz in a uk sung a thupiang dangte le ama sepsate le a matutsate khempeuh Israel kumpite khangthu ciamtehna laibute sungah kigelh khin hi lo ahi hiam? 9 Jehoahaz a pate tawh tawlnga khawm a Samaria ah kivui hi. Tuateh a tapa Jehoash db in luah a kumpi a suak hi.
Israel Kumpi Jehoash
10 Judah kumpipa Joash a kum sawmthum le sagihna kumin Samaria ah Jehoahaz tapa Jehoash Israel kumpi suaka, kum sawm le guk sung a uk hi. 11 Amah TOPA mit ah a sia-in gamta a, Nebat tapa Jeroboam in mawhna bawla Israel zong a bawlsakte panin kiheisan loin tuate a zomsuak hi.
12 Jehoash in a uk sunga thupiang dangte le ama hihsa le a matutsate khempeuh le Judah kumpipa Amaziah tawh a kidonate a kipan Israel kumpite khangthu ciamtehna laibute sungah kigelh khin hi lo ahi hiam? 13 Jehoash a pate tawh tawlnga khawma, Jeroboam in a kumpi tokhom a luah hi. Samaria ah Israel kumpite tawh Jehoash a kivuikhawm hi.
14 Tua laitakin Elisha a sih nading natna-in cina ta hi. Israel kumpipa Jehoash amah veh dingin paisuka amah a kah hi. Amah in, "Ka pa aw! Ka pa aw! Israel sakollengte le sakol tuangte aw!" a ci hi.
15 Elisha in, "Thal khat le thaltang pawlkhat la in," ci hi; a cih bangin a hih hi. 16 Amah in Israel kumpipa kiangah, "Na khutin thal la in," a ci hi. A lak khit ciangin Elisha in kumpipa khutte tungah a khut a koih hi.
17 Amah in, "Nisuahna tawhlet hong in," ci-a, a hong hi. Elisha in, "Kap in," ci-a, a kap hi. Elisha in, "TOPA gualzawhna thaltang, Aram tunga gualzawhna thaltang! Nang in Aphek ah Aram-te na sumaimang ding hi," a cikhia hi.
18 Tua ciangin amah in, "Thaltangte la in," ci-a, kumpipa in tuate a la hi. Elisha in, "Leilak satna in," ci-in a gen hi. Amah in thumvei sat-a a khawl hi. 19 Pasian mipa ama tungah heh a, "Leilak nga vei, guk vei na sat ding hi ven; tua ciang Aram na zo dinga, na siasak kiuhkeuh ding hi. Ahi hangin tu-in thum vei bek na zo ding hi," a ci hi.
20 Elisha si-in a kivui hi.
Tua hun lai-in Moab-te in khuakhal hun sialin tua gamah lutin a sim zel uh hi. 21 Khat vei Israel-te pawlkhat in misi khat a vui laitakun migilote hon khat a mu uh hi; tua ciangin amaute in misi luang Elisha han sungah a lawn uh hi. Tua misi luang in Elisha guhte a sukkhak ciangin misi nungta kik-a a khe in a ding hi.
22 Aram kumpipa Hazael in Jehoahaz uk sung tawntung Israel-te a nengniam hi. 23 Ahi hangin TOPA in Abraham, Isaac le Jacob-te tawh a thukhun hangin amaute hehpih in khuatuah a, amaute a khualna a lak hi. Tuni dongin ama ompihna pan amaute susia nuam loin a paikhia nuam kei hi.