Judah Kumpi Azariah
15
1 Israel kumpi Jeroboam a kum sawmnih le sagihna kumin Judah kumpipa Amaziah tapa Azariah uk ding a kipan hi. 2 Amah kumpi a suahin a kum sawm le guk pha a, Jerusalem ah kum sawmnga le nih sung a uk hi. A nu min Jecoliah hi a; Jerusalem pan ahi hi. 3 Amah in a pa Amaziah hih bang tektekin TOPA mit ah amaanin gamta hi. 4 Ahi zongin munsangte kikhinkhia lo a; mite in biakna pia-in gimnamtui a hal veve uh hi.5 Amah a sih dong TOPA in phak natna-in ea hingimsaka, inn tuam fb ah a teng hi. Kumpipa tapa Jotham in kumpi-inn kema, gam mite a uk hi.
6 Azariah uk sunga thupiang dangte le ama sepsate Judah kumpite khangthu ciamtehna laibu sungah kigelh hi lo ahi hiam? 7 Azariah a pate tawh tawlnga khawma, David Khuapi sung amaute gei-ah a kivui hi. Tuateh a tapa Jotham in a za luah a kumpi a suak hi.
Israel Kumpi Zechariah
8 Judah kumpi Azariah a kum sawmthum le giatna kumin Jeroboam tapa Zechariah, Samaria ah Israel kumpi suak-a kha guk sung a uk hi. 9 Amah in a pate hihsa bangin TOPA mit ah a sia-in gamta hi. Nebat tapa Jeroboam in mawhna bawla Israel zong a bawlsakte panin a kiheisan kei hi.
10 Jabesh tapa Shallum in Zechariah a sawmsim hi. Amah in mipi gc mai-ah doin suam-a a kumpi za a laih hi. 11 Zechariah uk sunga thupiang dangte Israel kumpite khangthu ciamtehna laibu sungah kigelh khin hi lo ahi haim? 12 Tua ciangin TOPA in Jehu tungah, "Israel kumpi tokhom tungah nangma suante khang lina dong a tu ding hi," hd ci-a a gensa a tangtung hi.
Israel Kumpi Shallum
13 Judah kumpipa Uzziah a kum sawmthum le kuana kumin Jabesh tapa Shallum kumpi suaka, kha khat sung Samaria ah a uk hi. 14 Tua ciangin Gadi tapa Menahem Tirzah panin Samaria dong a pai hi. Amah in Samaria a Jabesh tapa Shallum doin suamlum a, a kumpi za a laih hi.
15 Shallum uk sunga thupiang dangte le sawmsimna a makaihnate Israel kumpite khangthu ciamtehna laibu sungah kigelh khin hi lo ahi hiam?
16 Tua hun laitakin Menahem in Tirzah pan kipanin Tiphsah le a khuapi sunga om peuhmah le khua kiima omte a sim hi; bang hang hiam cih leh amaute in kongpite a hon nuam kei uh hi. Amah in Tiphsah buluh a numei naupaii khempeuh a kuikham khin hi.
Israel Kumpi Menahem
17 Judah kumpi Azariah a kum sawmthum le kuana kumin Gadi tapa Menahem, Israel kumpi suaka Samaria ah kum sawm sung a uk hi. 18 Amah TOPA mit ah asia in gamta hi. Nebat tapa Jeroboam in mawhna bawla Israel zong a bawlsakte panin ama uk hun sung khempeuh a kiheisan kei hi.
19 Tua ciangin Assyria kumpi Pul ie in a gamsung sim-a, Menahem in ama huhna a ngah nading le a kumpigam thakhauha a let suak theih nadingin ngun talent tulkhat jf a pia hi. 20 Menahem in hih sum Israel pan aana-a a don ahi hi. Mihau peuhmah ngun shekel sawmnga kg ta Assyria kumpipa tungah a piasak hi. Tua ciangin Assyria kumpipa nung kik-a, gam sungah a tam nawn kei hi.
21 Menahem uk sunga thupiang dangte le ama sepsa khempeuh Israel kumpite khangthu ciamtehna laibu sungah kigelh khin hi lo ahi hiam? 22 Menahem a pate tawh a tawlnga hi. Tuateh a tapa Pekahiah in a za luah a kumpi a suak hi.
Israel Kumpi Pekahiah
23 Judah kumpi Azariah a kum sawmngana kumin Samaria ah Menahem tapa Pekahiah Israel kumpi suaka, kum nih sung a uk hi. 24 TOPA mit ah Pekahiah a sia in gamta hi. Nebat tapa Jeroboam in mawhna bawla Israel zong a bawlsakte panin a kiheisan kei hi. 25 Ama ulian pipa khat Remaliah tapa Pekah in amah a sawmsim hi. Amah in Gilead pasal sawmnga kenga, Pekahiah le amah tawh Argob le Arieh-te Samaria a kumpi inn kulhpi sungah a suamkhawm hi. Tuaci-in Pekah in Pekahiah thata a kumpi za a laih hi.
26 Pekahiah uk sunga thupaing dangte le ama sepsate Israel kumpite khangthu ciamtehna laibu sungah kigelh khin hi lo ahi hiam?
Israel Kumpi Pekah
27 Judah kumpipa Azariah a kum sawmnga le nihna kumin Remaliah tapa Pekah, Samaria ah Israel kumpi suaka, kum sawmnih a uk hi. 28 Amah TOPA mit ah asia in gamta hi. Nebat tapa Jeroboam in mawhna bawla Israel zong a bawlsakte panin a kiheisan kei hi.
29 Israel kumpi Pekah hun sungin Assyria kumpipa Tiglath-Pileser pai-in Ijon, Abel Beth Maacah, Janoah, Kedesh le Hazor a la hi. Amah in Gilead le Galilee - Naphtali gam khempeuh la a - a mite Assyria ah a nawhkhia hi. 30 Tua ciangin Elah tapa Hoshea in Remaliah tapa Pekah a sawmsim hi. Amah in simin suamlum a, Uzziah tapa Jotham a kum sawmnihna kumin kumpi za a laih hi.
31 Pekah uk sunga thupiang dangte le ama sepsate khempeuh Israel kumpite khangthu ciamtehna laibu sungah kigelh khin hi lo ahi hiam?
Judah Kumpi Jotham
32 Israel kumpi Remaliah tapa Pekah a kum nihna kumin Judah kumpi Uzziah tapa Jotham in uk ding a kipan hi. 33 Amah kumpi a suahin a kum sawmnih le nga pha-a, Jerusalem ah kum sawm le guk sung a uk hi. A nu min Jerusha hi a Zadok tanu ahi hi. 34 Amah in a pa Uzziah hihsa bang tektekin TOPA mit ah thumanin a gamta hi. 35 Ahi zongin munsangte kikhinkhia nai lo-a, mite in tua lai-ah biakna pia-in gimnamtui a hal lai uh hi. Jotham in TOPA biakinnpi Kongpi Tungnung lampha hi.
36 Jotham in a uk sunga thupiang dangte le ama sepsate Judah kumpite khangthu ciamtehna laibu sungah kigelh khin hi lo ahi hiam? 37 (Tua hun lai-in TOPA in Aram kumpi Rezin le Remaliah tapa Pekah, Judah sim dingin sawl a kipan hi.) 38 Jotham a pate tawh tawlnga ta a, David Khuapi, a pa khuapi ah amaute tawh kivuikhawm hi. Tuateh a tapa Ahaz in a za luah a kumpi a suak hi.